Komisioni i Medias ka votuar për rrëzimin e dekretit të Presidentit Meta i cili kërkoi rishikimin e ligjit ‘anti-shpifje’ dhe tashmë pritet që të kalojë në Kuvend.
Gjatë seancës së sotme në komision ishte e pranishme ministrja e Drejtësisë, Etlida Gjonaj dhe këshilltari ligjor i Presidentit, Bledar Dervishi.
Sipas përfaqësuesit të presidencës disa dispozita të kësaj pakete bien në kundërshtim me parimet kushtetuese dhe mbrojtjen e të drejtës së lirisë së shprehjes, duke përbërë rrezik për interesin publik.
“Një pjesë e dispozitave të ligjit janë hap me tendencë pozitive. Presidenti vlerëson ndryshimet e ligjit për mbrojtjen e të drejtave të fëmijëve”, tha ai. “Por disa dispozita bien në kundërshtim me kushtetutën dhe cenojnë lirinë e shprehjes. Institucionet i vënë në zbatim gjobat pa pasur një vendim përfundimtar nga gjykata. Kjo i bën të pasigurta mediat. Krijon probleme për mediat online që janë kritike me qeverinë. Do çonte në autocensurë, frikë dhe mbyllje të mediave kritike. Një situatë e tillë do e çonte vendin në autoritarizëm”.
Ndërkaq ministrja Gjonaj pati një debat me kryetaren e komisionit Fatjona Dhimitri.
Fatjona Dhimitri: Si mund të gënjeni kështu. Këshilli i Europës tha dje që nuk janë marrë parasysh sugjerimet tona.
Etilda Gjonaj: Është hera e parë që më ftojnë dhe më ndërpresin.
Fatjona Dhimitri: Po na rrëfeni të vërtetën këtu.
Musa Ulqini: Lëre të mbarojë njëherë
Etilda Gjonaj: Nuk jam në rrëfimtore
Fatjona Dhimitri: Deklaroni të vërtetën
Etilda Gjonaj: Nuk jam as në prokurori. Nëse doni të dini qëndrimin e qeverisë unë mund të vazhdoj, nëse nuk doni, e ndërpres. /Opinion.al
