Aktualitet

Ambasadori gjerman Zingraf:Të vijojë zbatimi i marrëveshjes së 5 qershorit


Bëhu pjesë e Grupit Zyrtar të Opinion.al
>> KËTU <<
               Publikuar në : 10:04 - 03/10/20 |
el ida

Ambasadori gjerman Peter Zingraf, u ka bërë thirrje faktorëve politikë dhe institucioneve në Shqipëri të zbatojnë prioritetet e vendosura për integrimin në Bashkimin Europian dhe të çojnë përpara reformat. Ai tha se përmbushja e kushteve të vendosura ndaj Shqipërisë në rrugën e integrimit është në interesin e  vetë shqiptarëve dhe formësimin e të ardhmes së vendit.

“Në këta muaj Gjermania ka marrë përsipër një rol të veçantë me Presidencën e Këshillit në Bashkimin Evropian, i cili në mars i ka dhënë Shqipërisë PO-në për nisjen e bisedimeve të anëtarësimit. Perspektiva e integrimit në BE përcakton veprimet tona – jo vetëm që prej marsit, dhe shumë përtej Presidencës sonë në Këshillin e Bashkimit Evropian. Angazhimi ynë në kontekstin e politikave zhvillimore vazhdon të ketë si synim përmirësimin e kushteve konkrete të jetesës së njerëzve dhe mbështetjen në vendosjen dhe zbatimin e standardeve të BE-së.

Kushtet, që Këshilli i BE-së i ka vënë Shqipërisë në rrugëtimin e saj, u përgatitën vitin që shkoi nga Bundestag-u Gjerman dhe u pranuan njëzëri në vend si “Roadmap” për kalendarin shqiptar të reformave: Përmbushja e kushteve është në interesin thelbësor të vetë shqiptarëve për formësimin e të ardhmes së vendit të tyre. Ndaj u bëj thirrje të gjithë atyre, që mbajnë përgjegjësi politike si dhe të gjitha institucioneve relevante të zbatojnë së bashku këtë prioritet kombëtar dhe të çojnë përpara reformat në mënyrë të vendosur e të besueshme. Vetëm kështu njerëzit do të mund të rifitojnë besimin e nevojshëm në politikë dhe drejtësi.

Në deklaratën e tij dhënë online gjatë ceremonisë së 30 vjetorit të Bashkimit Gjerman, Ambasadori foli edhe për zgjedhjet e 25 Prillit, ndërsa u shpreh se palët duhet të vijojnë më tej zbatimin e marrëveshjes së arritur nga Këshillit Politik më 5 qershor. “Zgjedhje të lira, të ndershme e të paqta në datën 25 prill 2021 janë me rëndësi qendrore për të ardhmen politike të vendit, i cili është para sfidash të rëndësishme: rindërtimi pas tërmetit, menaxhimi i pasojave të Coronës, nisja dhe formësimi i bisedimeve të anëtarësimit me BE-në. Ndaj hapat e mëtejshëm në zbatim të marrëveshjes mbi Kodin Zgjedhor të arritur në Këshillin Politik në datën 5 qershor duhet të vijojnë më tej në një frymë konstruktive gjithëpërfshirjeje. Koha deri në zgjedhje është e paktë, shumë duhet bërë ende”, thotë ndër të tjera Zingraf./Opinion.al

 

 

 

Pas