Në vazhdën e reagimeve të ambasadave në Tiranë lidhur me votimet e 30 qershorit edhe ambasada Italiane ka dalë me një deklaratë ku bën thirrje për një proces sa më të qetë dhe sigurt.
Në deklaratë thuhet se qasja e Italisë i bashkohet asaj të Delegacionit të Bashkimit Europian lidhur me të drejtën e qytetarëve për të votuar në mënyrë të rregullt dhe të sigurt.
Dhuna është absolutisht e papranueshme dhe të gjitha palët politike duhet të shmangin provokimet, thuhet në deklaratë.
Ambasada mbështet procesin e integrimit europian dhe aktorëve politikë që pas zgjedhjeve të mbështesin institucionet demokratike dhe reformën në drejtësi në mënyrë që Gjykata Kushtetuese të jetë sa më shpejtë funksionale.
Deklaratë e Ambasadës së Italisë në Tiranë
Ambasada e Italisë në Tiranë i bashkohet plotësisht deklaratës së sotme të Delegacionit të Bashkimit Evropian. Është me rëndësi të veçantë që qytetarët që ushtrojnë të drejtat e tyre të mund ta bëjnë këtë në një mënyrë të rregullt. Gjithashtu, është përgjegjësi e drejtpërdrejtë e të gjithë aktorëve politikë për të siguruar që veprimtaritë e votimit – të cilat do të monitorohen nga një mision ndërkombëtar i udhëhequr nga OSBE / ODIHR ku marrin pjesë edhe vëzhgues nga disa vende anëtare të Bashkimit Evropian – të mos pengohen. Çdo veprim i dhunshëm ose çdo formë nxitjeje për dhunë, në çdo lloj rrethane, janë absolutisht të papranueshme. Të gjitha palët politike duhet të tregojnë përmbajtje dhe të shmangin retorikën provokuese.
Ambasada e Italisë thekson rëndësinë parësore të procesit të integrimit evropian të Shqipërisë. Në mënyrë që vendi të përparojë në këtë rrugë, është e nevojshme që të gjitha palët të angazhohen në një dialog të hapur dhe të sinqertë sa më shpejt që të jetë e mundur për të kapërcyer situatën aktuale politike dhe për të realizuar reformat e nevojshme. Në këtë kuadër, Ambasada e Italisë u kërkon të gjitha palëve të mbështesin reformën e drejtësisë në vijim dhe fton të gjitha organet dhe institucionet e përfshira të përshpejtojnë zbatimin e saj, veçanërisht duke garantuar emërime sa me të shpejta, në mënyrë që Gjykata Kushtetuese të jetë plotësisht funksionale. Është gjithashtu e rëndësishme që të gjitha palët të angazhohen në realizimin e reformës zgjedhore dhe të respektojnë shtetin e së drejtës, përfshirë këtu edhe luftën ndaj korrupsionit. /Opinion.al
