Rajoni

Albin Kurti: Nuk përjashtohet një sulm nga Serbia, ne jemi të përgatitur



Bëhu pjesë e Grupit Zyrtar të Opinion.al
>> KËTU <<
               Publikuar në : 15:55 - 11/08/22 |
Opi Nion

Kryeministri i Kosovës, Albin Kurti, nuk e ka përjashtuar mundësinë e një sulmi nga Serbia në kohën kur tensionet janë rritur me komunitetin serb në veri të vendit.

Në një intervistë të dhënë për Reuters të mërkurën e 10 gushtit, Kurti tha se përkeqësimi i situatës me pakicat serbe mund të rezultojë në një konflikt të ri të armatosur.

Kurti thotë se Kosova është e përgatitur për çdo situatë  dhe se nuk ka frikë.

“Nuk duhet të përjashtojmë që këto politika agresive të Beogradit mund të kthehen edhe në një sulm kundër Kosovës në një mënyrë apo tjetrën”, tha Kurti. “Ne jemi vigjilentë, por nuk kemi frikë.

Ai shtoi: “Nuk po them se do të na sulmojnë këtë javë ose në vijim, por do të ishte e papërgjegjshme të përjashtohej mundësia e rritjes së tensioneve dhe konflikteve të reja”.

Ndërkohë, tensionet  midis dy vendeve u ndezën së fundmi në prag të hyrjes në fuqi të vendimeve për targat dhe dokumentet e hyrje-daljeve për shtetasit serbë në Kosovë.

Kosova tha se makinat e qytetarëve të Kosovës do të duhej të regjistroheshin me targa të lëshuara nga institucionet e Republikës së Kosovës. Kjo përfshin targa me parashtesa si “PR”, “KM”, “PZ”, “GL”, “UR”, “PE” dhe “DA”, dhe do të preknin rreth 50,000 serbë që jetojnë në veriun e Kosovës me shumicë serbe.

Ndërkaq, situata u qetësua pasi Kurti, nën presionin e SHBA-së dhe Bashkimit Evropian, pranoi të shtyjë rregullimin e targave të makinave deri më 1 shtator dhe paqeruajtësit e NATO-s mbikëqyrën heqjen e postblloqeve të vendosura nga serbët.

Ndërkaq, Serbia akuzon Prishtinën për shkeljen e të drejtave të pakicave serbe.

Partitë opozitare në Prishtinë e kanë akuzuar Kurtin se po i tremb investitorët duke folur hapur për një konflikt të ri të mundshëm me Beogradin.

Ndërsa, Kurti i hedh poshtë këto akuza. Ai akuzoi Rusinë, e cila është aleati kryesor i Serbisë dhe ka vënë veton ndaj ofertës së Kosovës për anëtarësim në Kombet e Bashkuara, për një rol në nxitjen e tensioneve të reja etnike në ish-krahinën jugore të Serbisë.

“Presidenti rus, Vladimir Putin është një njeri i luftës dhe ai do të kishte interes për të përhapur luftën, sepse ai dëshiron të normalizojë luftën,” tha Kurti, duke aluduar për pushtimin e Rusisë në Ukrainën fqinje në shkurt.

“Ne i kemi institucionet dhe organet tona të sigurisë dhe mbrojtjes. Kosova tani është shtet.  Ky nuk është viti 1998”,- tha Kurti. “Ky është viti 2022, kështu që ne jemi shumë më të përgatitur për të mbrojtur sovranitetin tonë, integritetin territorial, demokracinë tonë, shtetin e së drejtës, kushtetutshmërinë dhe përparimin tonë.”

Kurti dhe presidenti serb Aleksandar Vuçiç pritet të takohen në Bruksel për më shumë bisedime më 18 gusht. Beogradi dhe Prishtina janë të përkushtuar publikisht për një dialog të ndërmjetësuar nga BE për të zgjidhur çështjet e pazgjidhura, por pak progres është bërë./Opinion.al

Pas