Lidhur me ngjarjen në Kuvendin e Kosovës pas një alarmi për bombë, tvklan.al, është drejtuar për informacion tek zëdhënësi i Policisë së Kosovës, Baki Kelani.
Në përgjigjen për redaksinë, ai dërgoi qëndrimin zyrtar të autoriteteve atje, ku shpjegon se si është marrë njoftimi për bombë dhe hetimet që po kryhen.
Në informacionin zyrtar sqarohet se ditën e sotme, me datë 5 korrik 2025, përmes një mesazhi kërcënues, është njoftuar se ndodhet një mjet shpërthyes në Kuvendin e Kosovës.
Pas këtij mesazhi kërcënues, janë ngritur grupet e posaçme hetimore dhe forcave blu, që kanë bërë rrethimin e institucionit shtetëror dhe kanë evakuuar çdo person nga objekti.
“Informacion zyrtar
Prishtinë, 5 korrik 2025
Sot, me datë 05.07.2025 në orët e paraditës, është pranuar një informatë (me sms), për një kërcënim me mjet shpërthyes në objektin shtetëror të RKS-së.
Me të pranuar informatën, janë angazhuar njësitë kompetente policore, të cilat fillimisht kanë bërë perimetrin e sigurisë dhe kanë evakuar personat nga objektet.
Policia e Kosovës, ka njoftuar prokurorinë kompetente dhe hetuesit policorë të cilët së bashku me njësitë dhe ekspertët përkatës për deminim, janë duke marrë veprimet e duhura të kontrollit në objekt”, thuhet në njoftim.
Kërcënimi me bombë vjen teksa sot do të mbahej përpjekja e 42-të e konstituimit të Kuvendit, gjë që pasoi në evakuuimin e të gjithë personave që ndodheshin brenda Parlamentit.
Gazetarja e Klan News, Blerta Dalloshi Berisha, raporton se fillimisht u mendua për evakuuimin e stafit të gazetarëve vetëm nga ambientet e brendshme, por më pas u bë dhe atyre e deputetëve, pa ditur se bëhej fjalë për bombë. Nuk dihet nëse ky kërcënim lidhet me seancat e dështuara të Kuvendit për ngritjen e institucioneve përkatëse në vend, që pas zgjedhjeve parlamentare të 9 shkurtit 2025./tvklan.al
