Zamir Velaj u qëllua me thikë ditën e djeshme, teksa kryente detyrën e tij si elektriçist i OSHEE-së. Ngjarja ndodhi në fshatin Oblikë të Shkodrës, ndërsa autori i ngjarjes u identifikua si, Martin Zefi, debitor i kompanisë, i cili i ka kërkuar Velajt t’i rilidhë dritat e prera, për shkak të debise.
Por ndërsa, familjarët kryejnë nderimet e fundit per njeriun e tyre të dashur, Kryeministri dhe ndjekësit e tij, vazhdojnë të aktrojnë e të përdorin politikisht dhimbje të tilla.
Edi Rama del sot të luajë rolin e radhës. Atë të njeriut të prekur nga dhimbja për punonjësin e OSHEE-së, që humbi jetën dje. Por, në vend që të shkonte në familjen e të ndjerit, Kryeministri i vendit u mjaftua me një homazh të shkruar në FB, në faqen ku çdo ditë trumbeton arritjet e tij dhe të qeverisjes së tij të suksesshme. Kaq vlen jeta e një njeriu zoti Kryeministër?
Një elektriçist u vra në krye të detyrës. Të gjitha mediat dhe portalet pasqyruan gjatë ditës së djeshme, por edhe sot lajmin e rëndë, që Rama nuk ka dashur ta lexojë. Kryeministri është mjaftuar me disa fjalë ngushëlluese, e sërish duke aktruar e duke luajtur me dhimbjen e njerëzve të thjeshtë, gjen rastin të tregojë arritjet e qeverisjes së tij kundër lidhjeve elektrike të paligjshme. A është ky rasti zoti Rama? Apo ndosha është rasti kur Drejtori i OSHEE-së duhet të shkojë e të takojë familjarët e Zamir Velajt në këtë moment dhimbjeje? Por të gjithë janë shumë të zënë. Rama me postimet e tij në Facebook dhe drejtori i OSHEE-se me pushimet e verës në jug të vendit, nga ku guxon të japë edhe intervista, natyrisht në kënde të mbyllura, të mos identifikohet sfondi.
Ne foto: Ardian Cela, drejtor i OSHEE
Mbase në vend që të na japin leksione aktrimi, do ishte mirë që Rama dhe shpura e tij, të siguronin jetën e njerëzve të thjeshtë që punojnë, e që në mënyrë të ndershme duan të sigurojnë jetesën. Për fat të keq, rasti i të ndjerit Zamir Velaj, nuk është i vetmi!
Lexoni të plotë Statusin e Ramës
HOMAZH ELEKTRIÇISTIT TË VRARË
Ndershmëria nuk bën lajm!
Therja barbare me thikë e një punonjësi të shtetit që nuk korruptohet, po kryen detyrën me përkushtim, si qindra të tjerë në kompaninë më të suksesshme publike të Shqipërisë, OSSHE, dhe gjen vdekjen duke i shërbyer interesit publik, po kalon thuajse pa u vënë re!…
Siç pritet, nuk e ve re hiç këtë masakër mbi shërbëtorin e shtetit, Partia Demokratike. E cila mjerisht, mezi e pret krimin e radhës, për të akuzuar Policinë e Shtetit, Ministrin e Brendshëm apo mua vetë. Po nuk e venë re thuajse fare, humbjen e jetës së një burri 44-vjeçar në krye të detyrës, as edhe vetë gazetat online; ato të cilat fatkeqësisht, shkojnë përditë shumë përtej lajmeve reale, e nuk lënë gënjeshtër e fantazi pa publikuar si lajm, skandal apo bombë.
Babai që la jetim një djalë 17 vjeçar, pse nuk pranoi t’i lidhte korentin në mënyrë të paligjshme një kafshe me dy këmbë, është shumë jashtë modës së imponuar nga kultura vulgare, për të cilën çdo njeri që punon për shtetin është hajdut, i paaftë, fanatik etj.etj.!
Në fakt jo!
Fatmirësisht jo dhe jo!
Sepse janë punonjësit e aftë e të ndershëm që e kthyen OSSHE-në, nga një gur në qafën e Shqipërisë, buzë humnerës energjitike e financiare të vitit 2013, në një histori suksesi që deri dje nuk e besonte thuajse askush në këtë vend dhe asnjë institucion ndërkombëtar financiar për be; sepse “shqiptarët janë mësuar ta vjedhin energjinë”; sepse “nuk çrrënjoset kultura çerekshekullore e vjedhjes së korentit në Shqipëri”; sepse “jemi të varfër dhe kemi të drejtë t’i vjedhim dritat” dhe “kështu do vazhdojmë tërë jetën, se ky vend nuk bëhet” e bla-bla-bla, plot broçkulla si këto…
Po ja që u bëka! Dhe ja që energjia po kthehet dita-ditës, nga një kuje e zezë kombëtare në një sektor që po le pas krizën çerekshekullore. E jo vetëm kaq, po edhe disa vjet të tjera, e sektori energjitik do të jetë burim kryesor i forcës së këtij vendi dhe mirëqenies së këtij populli. Nuk u bë kjo çudi vetëm se doli, më në fund, një qeveri që nuk thotë vidhi dritat po votën ma jep mua, po sepse njerëzit si Zamir Velaj, ndjesë pastë, bënë dhe bëjnë detyrën, me ndershmëri e përkushtim, në terrenin e një beteje tmerrsisht të vështirë, kundër kulturës mizerabël të vjedhjes e të justifikimit të vjedhjes së dritave dhe të përfoljes e përbaltjes të çdo njeriu që punon, e të çdo pune që bëhet!
Zamir Velaj nuk është viktima e parë e agresionit të egër fizik kundër punonjësve të OSSHE-së. Të tjerë janë goditur më parë, janë terrorizuar, plagosur, kanë luftuar me vdekjen në spitale apo kanë humbur edhe jetën, qyshse nisi reforma historike e energjisë! Po njësoj si Zamiri, nuk kanë bërë lajm thuajse fare, sepse lajmet nga ky sektor dhe kuja politike e mediatike, u është rezervuar qysh në fillim, vjedhësve “të shkretë” të energjisë!
Por OSSHE-ja ka vazhduar të bëjë progres, pikërisht sepse nuk janë më disa kokrra si deri dje, po është shumica e punonjësve të kompanisë së rilindur nga rrënojat, që prej kohësh tanimë, bën detyrën me ndershmëri e përkushtim. Të korruptuarit s’ka dyshim se nuk janë një farë e zhdukur prej aty, aspak jo! Por ama janë njerëzit si Zamir Velaj që përbëjnë shumicën. Dhe OSSHE-ja është vetëm një shembull i mirë e kuptimplotë nga Shqipëria, ku ndryshe nga çfarë propagandon përditë kultura vulgare e përfoljes dhe përbaltjes së të gjithëve, gjërat janë ca më ndryshe. Madje shumë më ndryshe!
Ngushëllimet e mia më të ndjera Geraldit, djalit të Zamirit, bashkëshortes së tij, Dhuratës, si edhe tri motrave që humbën vëllanë e vetëm!
Mirënjohje dhe respekt për Zamir Velajn dhe për të rënët e tjerë në krye të detyrës, në frontin e kësaj beteje kaq të vështirë dhe jetike për shoqërinë tonë! Po edhe për të gjithë kolegët e koleget e të ndjerit, ngushëllime, mirënjohje dhe respekt gjithashtu.
I paharruar qoftë kujtimi i Zamirit dhe përparimi i mëtejshëm i kompanisë në rrugën e suksesit e në përmbushjen me cilësi gjithnjë e më të mirë të shërbimit ndaj konsumatorëve, qoftë shprehja e vazhdueshme e mirënjohjes dhe respektit tonë për të ndjerin.
