Një nga autorët e sulmit terrorist në një xhami në Zelandën e Re është identifikuar si 28-vjeçari Brenton Tarrant. Me gjakftohtësi ai vrau 49 besimtarë myslimanë, ndërsa mediat e përshkruajnë si të indoktrinuar nga ideologjia ekstremiste dhe neonaziste. 28-vjeçari, pasi i ati i vdiq nga kanceri u largua nga Australia për 7 vite duke udhëtuar në botë, duke përfshirë Korenë e Veriut dhe Pakistanin. Të ardhurat i fitonte nga Bitcoin.
Një video 17-minutëshe nga sulmi, e cila fillimisht u publikua në Facebook, nis me një skenë ku 28-vjeçari identifikon veten, teksa më pas niset drejt xhamisë, Al Noor. Po ashtu në këtë video dëgjohet një këngë nacionaliste serbe. Sipas ambasadorit të Bosnje Hercegovinës në Zelandën e Re, agresori kishte dëgjuar kënge nacionaliste serbe që glorifikonin Radovan Karaxhic.
Kënga është krijuar më 1995 dhe që në fillim është quajtur “Karaxhiç, udhëheq serbët e tu”, i referohet, liderit të serbëve të Bosnjës, Radovan Karaxhiç, i ashtuquajtur edhe si Kasap i Ballkanit, që është dënuar nga Gjykata e Hagës më 2016, për genocid.
“Ujqit po vijnë, kujdes ustashë dhe turq”, thuhet në një pjesë të tekstit, e cila u referohet luftëtarëve nacionalistë kroatë dhe myslimanëve boshnjakë.
“Karaxhiç, udhëheq serbët e tu. Udhëheq serbët e tu. Të gjithë duhet të shohin se ne nuk i frikësohemi askujt”.
“Në mbrojtje të popullit serb, duke luftuar për lirinë tonë të dashur, lirinë tonë të dashur”, vazhdon teksti i këngës.
Në disa pamje direkte të videos, që ka qarkulluar në kohë reale, në armët e sulmuesit janë parë emra të serbëve si Millosh Obiliç dhe Car Llazari, që së bashku kanë luftuar kundër otomanëve në Betejën e Kosovës më 1389. Përveç këtyre dy emrave shihen edhe shumë emra të luftëtarëve të asaj kohe që kanë luftuar kundër turqve.
Në këtë dokument 74 faqe, Tarrant mohon se është anëtar i ndonjë organizate, por pranon se “ai është frymëzuar” nga terroristi norvegjez i së djathtës ekstreme, Anders Breivik, që ka vrarë 77 persona në një sulm me bombë dhe armë zjarri në Oslo më 2011.
Para sulmit, Breivik pati publikuar 1,500 faqe të dokumenteve, me qindra referenca të konflikteve në Ballkan. Bazuar në gazetën The Economist, Kosova përmendet në dokumentet e Breivikut 143 herë, Serbia, 341 herë, Bosnja 343 herë dhe Shqipëria 208 herë. E përditshmja, The New Zealand Herald e ka përshkruar sulmin në xhami si vrasjen më masive në këtë shtet nga viti 1943./Opinion.al
