Teksa shumë vende perëndimore kanë mbyllur ambasadat e tyre në Kabul pas marrjes së qytetit nga ana e talebanëve, një numër shtetesh ende po e mbajnë derën hapur për marrëdhëniet me talebanët.
BBC shkruan se një zëdhënëse e ministrisë së jashtme të Kinës i tha agjencisë së lajmeve AFP se Pekini mirëpriti mundësinë për të çuar më tej marrëdhëniet me Afganistanin.
“Talibanët kanë shprehur vazhdimisht interes për të zhvilluar marrëdhënie të mira me Kinën dhe ata mezi presin pjesëmarrjen e Kinës në rindërtimin dhe zhvillimin e Afganistanit … ne e mirëpresim këtë,” tha ajo.
Ambasadori i Rusisë në Afganistan, Dmitry Zhirnov, do të takohet të martën me një përfaqësues të talebanëve për të diskutuar për sigurinë e ambasadës në Kabul, e cila do të mbetet e hapur. Moska ka thënë se shpreson të zhvillojë lidhjet me talebanët, edhe pse thotë gjithashtu se nuk do të nxitojë për t’i njohur ata si sundimtarë të vendit.
Presidenti iranian Ebrahim Raisi ka thënë se “dështimi ushtarak” i SHBA në Afganistan ofron një mundësi për të vendosur paqe të qëndrueshme në vend. “Humbja ushtarake e Amerikës dhe tërheqja e saj duhet të bëhen një mundësi për të rikthyer jetën, sigurinë dhe paqen e qëndrueshme në Afganistan”, tha Raisi./Opinion.al
