Të tjera detaje dalin në dritë pak ditë pas prokuroria bëri të ditur nisjen e hetimeve për uniformat e policisë. Organi i akuzës nisi hetimet pasi ëshët kosntatuar se veshjes së policisë i doli boja për pak muaj. Pra kanë cilësi të dobët. Sakaq, Ministria e Brendshme nxitoi të thoshte se për shkak të cilësisë së dobët, kompanisë nuk i është bërë asnjë pagesë.
Por, sot është siguruar një fature e paguar nga Thesari i Shtetit dhe e publikuar nga portali “Spending Data Albania”, ku konstatohet se policia nuk ka thënë të vërtetën. Sipas kësaj fature, Policia e Shtetit më 24 maj të këtij viti, i ka paguar kompanisë “Marsi & AL” një shumë prej 22 milionë lekësh (të reja) për uniformat dhe veshjet speciale.
Siç duket në foto, kjo pagesë është bërë nga Thesari për llogari të Qendrës së Furnizimit të Materialeve Teknike që është në varësi të Drejtorisë së Përgjithshme të Policisë së Shtetit.
Veç kësaj, policia njoftoi se është bërë kallëzim penal në prokurori për kompaninë Marsi & AL. Por burimet zyrtare pranë organit të akuzë thanë se nuk ka një kallëzim penal në prokurori ndaj kësaj kompanie, raporton televizioni Abc News.
Nga ana tjetër, policia njoftoi se me datën 2 shtator është ndërprerë kontrata me kompaninë shqiptaro-turke. Gjithashtu policia pretendoi se po përgatitet dokumentacioni që do të dorëzohet pranë Agjencisë së Prokurimeve Publike me qëllim përjashtimin e saj nga konkurimi në tendera publikë.
Por, nga të dhënat e zbardhura nga portali “Spending Data Albania” rezulton se institucione të ndryshme shtetërore që nga 1 janari 2015 deri më 19 shtator 2016, kanë derdhur në llogaritë bankare të kompanisë Marsi & AL një shumë prej rreth 700 mln lekësh (të reja).
Sipas prokurorisë, pritet që në ditët në vazhdim të merren në pyetje të gjithë anëtarët e Komisionit të Vlerësimit të ofertave pranë Ministrisë së Brendshme, të cilët kanë shpallur fituese kompaninë shqiptaro-turke. Kjo, pasi rezulton se kompania është shpallur fituese nga anatërët e këtij komisioni pa plotësuar kriterin kryesor të këtij tenderi, që është çertifikata e cilësisë.
Gjithashtu hetuesit kanë konstatuar se kompania nuk ka prodhuar uniformat në Turqi, siç është deklaruar, por në qytetin e Durrësit, pasi nuk është gjetur asnjë faturë doganore e importimit të tyre në dogana.
