Shënim nga Dritan Laci
Ka qenë disi e çuditshme deklarata e mbrëmshme e kryeministrit Rama në Opinion, kur tha se nuk kishte pasur kohë të bënte zgjedhje në Parti, pasi i ishte dashur të mendonte për Shqipërinë, për zahmanë që e kishte zënë dhe Saliun që i kishte lënë një gropë që vetëm ai e dinte se ç’po hiqte për ta mbushur.
A ta besojmë Ramën kur thotë se s’kishte kohë? Edhe pse dua ta besoj kryeministrin tim pasi ai vetë kështu na ka edukuar që duhet ta duam kryeministrin tonë dhe jo ta përgojojmë lart e poshtë, prapë e kam të vështirë ta besoj kryeministrin tim kur thotë që nuk kam kohë.
A i mungonte koha z. Rama për të bërë zgjedhje në Parti, kur shpërndante cetifikatat e legalizimeve, si të ishte jo Kryeministri i vendit, por një drejtor Rajonal i rëndomtë i ALUIZN-it?
A i mungonte koha z. Rama për të bërë zgjedhjet në Parti, kur shëtiste nga një qytet në tjetrin, për të shpërndarë kartat e anëtarësimeve, si të ishte jo Kryetari i Madh, por një kryetar partie deri diku edhe me pak tagër se i një province?
A i mungonte koha z. Rama për të bërë zgjedhjet në Parti, kur gjeti kohë të pyeste deputeten e Partisë Demokratike se ku e kishte lagur letrën?
A i mungonte koha z. Rama për të bërë zgjedhje në Parti, kur hapi katër ekspozita me pikturat e tij nga Europa në Azi, edhe pse Shqipëria për hit të së vërtetës, keq ishte edhe kur kryeministri bënte xhiron e botës me pikturat e tij?
Ndaj unë nuk mund ta besoj Z. Rama kur thotë që nuk kishte kohë të bënte zgjedhje në Parti.
Apo që hallëmadhja Shqipëri që i la faqeziu Sali ia pamundësuan kohën të bënte zgjedhje.
A ta besojmë? Nëse unë do përdorja ironinë që z,. Kryeministri regji mbrëmë në “Opinion”, unë do të thosha: Po kryeministri im nuk ka kohë, sepse atij i duhet të mendojë për 200 mijë shqiptarë që i kanë firuar në 2.5 vite qeverisje të tij; Po kryeministri im nuk ka kohë, sepse shendetësia në mos ishte keq e më keq, është bërë edhe më keq, kur Ministri i Shëndetësisë del dhe bën producentin e grave fakire të cilave u kërkon falenderime me pahir për check up-in; Po kryeministri i vendit tim nuk ka kohë për zgjedhje në partinë e tij sepse papunësia te të rinjtë ka vajtur në 32 përqind.
Nëse do kishe folur kështu kryeministri im i dashur, atëherë unë edhe mund të të besoja. Por prapë nuk kam se si të besoj kur gjen kohën të flasësh 40 minuta në promovimin e një libri në bibliotekë, dhe nuk gjen dot kohën të zgjidhesh; dhe për më keq akoma të gjesh kohën dhe të mos lesh zërat që flasin për nevojën urgjente për demokraci brenda partisë tënde. Pra nëse ti gjen kohën për certifikata legalizimesh, për promovime librash, për të gjetur kohë ku e lagin gratë e krahut tjetër letrën, për të bërë qepaze Saliun çdo minutë të kushtueshëm të operacionit tënd për të shpëtuar Shqipërinë, atëherë si nuk gjen dot kohë për demokraci brenda partisë që drejton; atë demokraci që luftove aq shumë për ta sjellë në këtë Parti? A duhet të të besojmë?!!!
