Policia duket e pafuqishme ndaj krimit në Shkodër. Ministri i Brendshëm, Sandër Lleshaj gjatë prezantimit të Prefektit të ri të Qarkut Shkodër, Valdrin Pjetri, tha se krimi ka lëshuar rrënjë në Shkodër.
“Pritshmëria dhe nevoja e qytetarëve të Shkodrës për më shumë siguri ëhstë e lartë. Sezoni i ri turistik dhe fushata zgjedhore do të kërkojë dhe një angazhim mëtë madh të sigurisë dhe rendit publik. Niveli i sigurisë është sfiduar disa herë në Shkodër, kemi patur goditje të forta të sigurisë që vjen si pasojë e krimit të organizuar. Përforcimet e reja që do marri nga ministria e brendshme, për të garantuar që siguria në qarkun e Shkodrës të jetë në nivelin që meriton. Qytetarët të bëhen palë me policinë, përball krimit”, tha Lleshaj, i cili gjatë së shtunës shkarkoi drejtorin e Policisë së Shkodrës, Vehbi Bushati.
Rreth një vit më parë, ish-Ministri i Brendshëm Fatmir Xhafaj, pati deklaruar se në Shkodër veprojnë 4 grupe kriminale, por pa identifikuar asnjërin prej këtyre grupeve. Në të vërtetë, grupet kriminale që veprojnë në Shkodër kanë një histori më shumë se 25 vjeçare, mbushur me vrasje, kërcënime, trafik droge, prostitucion, rrëmbim të pronave, etj. Gjatë viteve, disa prej grupeve u larguan nga skena pas vrasjes së drejtuesve të tyre. Mbijetuan grupet më të fuqishme, ato që ishin organizuar në bazë familje.
Veprimtaria dhe mbijetesa e tyre deri më sot i dedikohet mosndërhyrjes në territoret dhe veprimtarinë e njëri-tjetrit dhe aftësisë për të mbështetur grupimet politike, herë të majta e herë të djathta, sipas rotacionit në qeverisje.
Por, qetësia mes grupeve u përmbys në 13 janarin e vitit të kaluar, pas një atentati me lëndë shpërthyese të telekomanduar ndaj biznesmenit Lulzim Kulla. Sipas policisë, ai ishte një figurë e njohur e krimit në Shkodër. Në këtë atentat, të kryer fare pranë tregut më popullor të qytetit, mbetën të plagosur 8 persona, mes të cilëve edhe vetë Kulla. Ngjarja u pasua nga atentate të njëpasnjëshme ku, deri tani, kanë mbetur të vrarë 9 persona ndërsa dy të tjerë figurojnë të zhdukur./Opinion.al
