Kryetari i Bashkisë së Tiranës, Erion Veliaj ka thënë se së shpejti do të nisë zbatimi i projektit të linjës së shpejtë të autobusëve. “Bus Rapid Transit” është modeli i transportit publik i cili gjendet në vendet më të zhvilluara të Europës, Amerikës, dhe Kinës.
“Lajmi i mirë është se shumë shpejt Tirana nis zbatimin e projektit të “Bus Rapid Transit”, ose ndryshe në shqip, “Linja e Shpejtë e Autobusëve”, që ka mbështetjen e KFË-së dhe GIZ-it gjerman, gjithashtu edhe të Qeverisë Shqiptare. Ky sistem inovativ i transportit publik do të prekë linjat kryesore të qytetit. Pra këtu do të përfshihet Kinostudio-Kombinat, Unaza, dhe linja e Tiranës së Re”, sqaroi Veliaj.
Tre përfitimet kryesore nga ky projekt, sipas Veliajt, do të jenë:
- Dyfishimi i shpejtësisë së lëvizjes së autobusëve, nga 9-9.5 në 20 km/h.
- Do përgjysmohet koha e një cikli të plotë që përshkon një autobus i linjës urbane, nga 54 minuta që shkon Unaza do të shkojë në 24 minuta.
- Kapaciteti i transportit do të rritet nga 9 mijë pasagjerë në orë në 23 mijë udhëtarë në orë.
Kryebashkiaku thotë se transporti publik është më mirë se si ka qenë nga moment që mori detyrën por përsëri ka nevojë për punë.
“Imagjinoni pak, kemi shtuar 3 linja të reja. Rrjetin e transportit brenda qytetit, e kemi rritur në 375Km nga 169km që ishte dhe është rritur nga 8 në 17 numri i linjave rreth-qytetase. Autobusi vinte në stacion mesatarisht çdo 37 minuta në 2015-ën. Sot kjo kohë është ulur në 7 minuta dhe duhet të ulet akoma. Nuk jemi ende atje ku duhet, por me transportin publik gjërat kanë ndryshuar shumë”, tha ai.
Kryetari i Bashkisë Tiranë përmendi faktin se përfundimi i Unazës së Madhe do të ndihmojë shumë në uljen e trafikut në të gjitha hyrje-daljet e Tiranës.
Veliaj ka thënë gjithashtu dhe se përfundimi i Unazës së Madhe do të lehtësojë uljen e trafikut në të gjitha hyrjet dhe daljet e Tiranës.
“Unaza e Madhe duhet të kishte mbaruar, keni të drejtë! Por ne humbëm 3 vjet falë politikës së sherrit dhe të zullumit, të atyre që e kanë kthyer në sport bllokimin e punëve të mira të qytetit”, shtoi ai.
Duke thënë se Tirana ka ndërtuar 58 km korsi biçikletash dhe sipas tij janë shumë për një qytet. Ai thotë se ndërtimi i korsive ka sjellë dhe rritje të përdorimit të biçikletave.
“Imagjinoni sikur të ishin edhe ata me makina, do të kishte më shumë trafik”, kujtoi ai.
Tirana sot ka rrugë shumë herë më të sigurta, të pajisura me sinjalistikë dhe me trotuare të zgjeruara e kangjella mbrojtëse. Rrugët kryesore janë pajisura me çdo element për të krijuar kalimet e sigurta dhe të ndriçuara për këmbësorët, ka thënë Veliaj. /Opinion.al
