Një shkollë e re për nxënësit e Njësisë 8 do të çelë dyert këtë vit shkollor. Shkolla “Lekë Gjiknuri” që ka të njëjtën cilësi si 40 ndërtesat e reja arsimore të ndërtuara në Tiranë, 12 prej të cilave hapen në shtator do t’i japë fund zhvillimit të mësimit me dy turne. Kështu u shpreh kryebashkiaku i Tiranës, Erion Veliaj.
“Është një bizhu e vogël, jo një nga shkollat masive që kemi bërë në zonat e reja të Tiranës me nga 10 mijë m2 e me kapacitet 1500 nxënës, si “Sami Frashëri”, “Nënë Tereza” apo “Kennedy” te kthesa e Kamzës – por është një shkollë e përmasave të vogla, kryesisht për të akomoduar të gjithë fëmijët dhe banorët e “Medresesë”, Rr. “Muhamet Malo”, Rr. “Besim Daja” dhe zonës që lidh “Medresenë” me “Rrugën e Dibrës” nga njëra anë, dhe me unazën në anën tjetër,” u shpreh Veliaj.
Ai shtoi se godina që sot po rikthehet në funksion të nxënësve si shkollë, nga administrata e kaluar në bashkia ishte dhënë për zyrat e Ujësjellësit. “Kjo është një nga shkollat që filloi me vonesë për çështje të pronësisë dhe një anomalie që trashëguam, pasi ishte nisur si shkollë dhe ishte kthyer në godinë ujësjellësi, ku vinin mjete që s’kishin vend në zemër të Tiranës. Sot Ujësjellësi është zhvendosur në periferi, kurse këtë hapësirë ia kemi rikthyer qytetarëve të Njësisë 8”, u shpreh Veliaj.
Referuar reshjeve të dendura të ditëve të fundit, Veliaj kishte një mesazh edhe pë rata politikanë që mezi prisnin të binte shi në Tiranë: “Javën e kaluar ishte përmbytur Firence, Lioni, edhe qytetet në Angli e Gjermani, ndaj nuk ka nevojë për histeri. Shiu bie, do kullojë. Të tillë klimë kemi tani, kur shiu bie i gjithi brenda një ore, ndaj s’ka nevojë të panikoset njeri pse u lagën makinat. E kam fjalën sidomos për këta fansat tanë politikë, të cilët e kishin mundësinë, mund t’i kishin bërë të gjitha këto investime, por s’i bënë. Kush është qytetar i pjekur dhe shikon se në të gjithë botën po përballemi me të njëjtat situata, do duhet të na mirëkuptojë”, deklaroi ai./Opinion.al
