Pas tërmetit që goditi mbrëmjen e djeshme Bosnjë-Hercegovinën aparatet e Qendrës për Sizmologji të Institutit Federal Hidrometeorologjik në Bosnjë kanë regjistruar një sërë tërmetesh të tjera më të vogla.
Për këtë situatë, Ekspertja për sizmologji, Merjema Genjac është shprehur se ishin të pritshme të gjithë lëkundjet e ndodhura pas tërmetit 5.6 ballë i shkallës rihter që goditi Bosnjën.
“Pas tërmetit të parë të fortë prej 5.6 ballë të shkallës Rihter, ishte normale të pritej një seri tërmetesh të mëvonshme. Ne i monitorojmë, i regjistrojmë dhe i përpunojmë të dhënat gjatë gjithë natës dhe mund të them se ishin 12 tërmete më të vogla. I fundit ka ndodhur mëngjesin e sotëm në orën 8.20”, ka thënë Genjac.
Më tej ajo ka deklaruar se priten tërmete më të forta në Bosnjë-Hercegovinë , sepse numri i dukurive të tilla ka qenë nën mesataren për një kohë të gjatë, kështu që energjia është akumuluar.
“Njëra prej tyre kalon nga Banja Luka dhe Petrinja dhe mund të themi se një pjesë e asaj energjie lirohet në zonën e Petrinjës. Ne e kemi këtë pjesë hercegovinase, por na ka mbetur kjo pjesë qendrore, e cila kalon nëpër Jajce, Zenicë dhe vende të tjera, kështu që nuk mund të themi se e gjithë energjia është lëshuar Bosnjë-Hercegovinë”, është shprehur ajo.
Ajo thekson se forca e tërmeteve, zona ku do të ndodhin, është e pamundur të parashikohen.
