Shërbimet e policisë, gjatë orëve të para të mëngjesit janë ndeshur me një situatë si nëpër filma.
Uniformat blu, bëjnë me dije se gjatë orës 02:45, në Qaf-Kashar i është bërë shenjë për të ndaluar një automjeti, por drejtuesi i ka dhënë gaz makinës dhe është larguar drejt Fushë-Krujës.
Menjëherë policia është vënë në ndjekje të automjetit, i cili përplasur me një bordurë. Personat që ishin brenda në automjet janë larguar duke i shpëtuar sërish policisë.
Policia e Tiranës bën me dije se pas verifikimeve, targat e mjetit rezultojnë të vjedhura disa ditë më parë.
“Më datë 14.01.2022, rreth orës 02:45, në Qafë-Kashar, shërbimet e Policisë i kanë bërë shenjë ndalimi një mjeti, i cili nuk ka ndaluar dhe është larguar në drejtim të Fushë-Krujës.
Në tentativë për t’u larguar nga Policia, në Fushë-Krujë, mjeti është përplasur me një bordurë.
Personat që ndodheshin në mjet, kanë dalë dhe janë larguar, duke braktisur mjetin.
Pas verifikimeve nga Policia, targat e mjetit rezultojnë të vjedhura disa ditë më parë.
Grupi hetimor po punon për identifikimin dhe kapjen e autorëve dhe sqarimin e rrethanave të ngjarjes.
Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale”,-njofton policia./Opinion.al
