Zbardhet dëshmia e personit që çoi në spital Vinçens Pirolin, i cili mbeti i plagosur pas një atentati me armë zjarri.
Sipas “News24”, personi që e transportoi Pirolin në spitalin e Lezhës është shtetasi Mark Nika. Mësohet se ky i fundit është kushëri i 34-vjeçarit.
Në deklaratën e tij për policinë, zbulohet se Nika ka thënë se së bashku me Pirolin janë nisur nga Lezha drejt Shkodrës pasi 34 vjeçari i kishte thënë se do të takonte një person.
“Jemi nisur nga Lezha për në Shkodër, pasi Vinçensi më tha se do të takonte një person. Kemi mbërritur në Shkodër rreth orës 18:30. Në hyrje të urës së Bahçallekut që është edhe hyrja e Shkodrës Vinçensi ka zbritur nga makina dhe është futur në një rrugë dytësore. Aty kishte edhe një xhami. Unë e kam pritur në makinë. Papritur kur erdhi dikush e kishte plagosur. Unë nuk e di as se kush e ka plagosur dhe as arsyen sepse nuk më ka treguar.
Pastaj e kam dërguar ashtu të plagosur tek spitali i Lezhës, sepse nuk donte ta çoja në Shkodër, për shkak se kishte frikë se mund t’i ndodhte ndonjë gjë. E kam çuar në spitalin e Lezhës dhe e kam lënë aty. Nuk e kam idenë se kë ka takuar dhe se kush e ka plagosur”, mësohet të ketë thënë në dëshminë e tij për policinë shtetasi Mark Nika.
Ndërsa në dëshminë e tij para hetuesve, Piroli ka deklaruar se shkoi në Spitalin e Lezhës pasi “aty ndihej i sigurt”.
I plagosur Piroli është dërguar më pas në Spitalin e Traumës në Tiranë, ku dhe ndodhet jashtë rreziku për jetën.
Piroli është një person i shpallur në kërkim ndërkombëtar. Mali i Zi e kishte shpallur person në kërkim pasi Vinçens Piroli së bashku me Dorjan Lalën dyshohen se kanë vrarë malazezin Momçillo Gjurishic.
Në 12 tetor të vitit të shkuar, shefi i sektorit kundër kriminalitet dhe korrupsionit në Malin e Zi, Aleksandar Boshkoviç deklaroi se dy shqiptarët janë të dyshuarit kryesorë për vrasjen e ndodhur më 4 korrik 2021 në Ulqin, pasi janë gjetur prova të mjaftueshme kundrejt tyre.
