Policia ka dhënë detaje rreth aksidentit të ndodhur në orët e parë të mëngjesit të sotëm në aksin rrugor, Shkodër-Velipojë, ku mbeti i vdekur një 16-vjeçar.
16-vjeçari humbi jetën teksa po drejtonte një motokorrëse dhe hyri nga një rrugë dytësore në kryesore, ku dhe u përplas nga një furgon.
Bëhet me dije se aksidenti dyshohet të ketë ndodhur për shkak të kushteve atmosferike, mungesës së fushëpamjes si pasojë e mjegullës.
“Rreth orës 06:00, në aksin rrugor Shkodër –Velipojë, në vendin e quajtur “Trush i Poshtëm”, L. L., banues në lagjen “10 Korriku”, Shkodër, duke drejtuar mjetin tip “Benz” është përplasur me një mjet bujqësor (motokorrëse) që po dilte nga një rrugë dytësore për në rrugën kryesore.
Për pasojë ka ndërruar jetë drejtuesi i motokorrëses O.G. 16 vjeç, banues në fshatin Trush.
L.L., është shoqëruar në ambientet e DVP Shkodër për veprime te mëtejshme
Aksidenti dyshohet të ketë ndodhur për shkak të kushteve atmosferike (mungesës së fushëpamjes si pasojë e mjegullës)”, njofton policia.
Grupi hetimor ndodhet në vendngjarje dhe vijon punë për sqarimin e rrethanave të aksidentit./Opinion.al
