Sportisti shqiptar Ferit Keta fitoi gjerdanin e artë në peshën kruizer në kik boks. Titulli që jepet nga Federata Ndërkombëtare e Kikboksit e bën shqiptarin sportistin më të fortë në botë në këtë kategori.
Luftëtari 32-vjeçar u ndesh në kalanë e Bashtovës kundër rivalit hoalndez Guilermo Blokland dhe fitoi pasi e rrëzoi atë në tapet. Para qindra shqiptarëve të pranishëm, Keta ishte superior në ring dhe u shpall fitues në raundin e tretë nga pesë raunde që ishte dueli. Fitorja e 15 për të nga 15 ndeshje në ring.
Blokland është një sportist me shumë përvojë që vinte në kalanë e Bashtovës pas 44 duelesh ku kishte fituar 24 herë dhe mundur 16 herë. Superioriteti i kik bokserit shqiptar u shfaq që në raundin e parë, ku ai e vuri në vështirësi kundërshtarin.
Përballja mes tyre u bë e fortë edhe në raundin e dytë, ndërkohë që në të tretin Blokland e pati të vështirë që të mbante vrullin e Ketës, që 19 sekonda nga fundi i dha goditjen përfundimtare duke e rrëzuar në tapet. Luftëtari shqiptar mori gjerdanin e artë mes duartrokitjeve të publikut të zjarrtë.
Klan News
