Vlora vijon të mbetet një nga qytetet problematike përsa u përketë aktiviteteve kriminale. Që nga muaji shkurt deri mbrëmjen e djeshme janë ekzekutuar nëpërmjet atentateve 4 persona.
Në datë 6 shkurt në Vlorë u vra Gentian Qarri në një atentat mafioz, ndërsa pista kryesore e hetimit është e shkuara e tij, pasi kishte qenë dënuar më parë në Itali me 15 vite burg për drogë.
Në datë 3 mars u ekzekutua Tauland Gjikaj në mes të ditës në afërsi të Gjykatës së Apelit në Vlorë. Pista ku po hetohet është borxhi, ndërsa deri tani janë dy të arrestuar.
Në 10 Maj u vra Bledar Birçaj në mes të ditës me kallashnikov. Ai ka qenë i arrestuar në vitin 2011 për veprën penale vrasje e mbetur në tentativë, por është liruar për mungesë provash dhe sapo ishte kthyer nga Spanja.
Mbrëmjen e djeshme u qëllua me breshëri plumbash Delion Troqes. 38-vjeçari u ekzekutua përpara servisit të tij në qytetin bregdetar rreth orës 21:40 minuta, ndërsa autorët dogjën makinën në Sherishtë dhe u zhdukën duke humbur gjurmët në errësirë.
Delion Troqes e atentatit të djeshëm është kushëriri i Ervis Troqes, i cili u zhduk në vitin 2018 në mes të ditës në Vlorë dhe ende nuk ka asnjë gjurmë të tij./ Opinion.al
