Kreu i Partisë Demokratike, Lulzim Basha, ka vizituar këtë të hënë një fermë të vogël në Marikaj, Vorë. Gjatë bashkëbisedimit me pronarët, Basha është njohur me vështirësitë me të cilat ata përballen.
Zonja Mira Maraj i ka thënë se puna e saj vlen vetëm për të siguruar bukën dhe për të jetuar. Sakaq ajo thotë se mungesa e tregut për të shitur prodhimet është një nga problemet e tyre, ndërsa shprehet se shteti nuk i ka ardhur në ndihmë me asnjë subvencion.
“Kemi mbjell, por nuk shkon pazari! Jam e vjetër, kam heq edhe zinë. Tani është koha që nuk sigurojmë bukën, ne me atë punë hamë. Janë përgatitur se i hedhim pleh, i hedhim dap. Nuk marrim asnjë subvencion nga shteti”, Mira Maraj.
Kreu i PD deklaroi se e vetmja arsye e mungesës së tregut, është rënia e fuqisë blerëse. Zgjidhja e vetme, sipas tij, është ndryshimi që do vij më 25 prill, ku 100 milion euro do të shkojnë subvencione, për fermerët.
“Ekonomia është tërësisht e shkatërruar. Kështu që dua t’i them të gjithë grave punëtore në veçanti në fshat, nga gocat e reja deri te nënat si ty, që ne do bëjmë gjithçka që ekonomia të vihet në lëvizje e njerëzit të ketë para për të blerë këto. Në 25 Prill është data dhe të gjitha këto prodhime të mrekullueshme ne do garantojmë që të shkojnë në treg dhe njerëzit të kenë lekë për t’i blerë. Kjo është një nga gjërat kryesore që do të ndryshojmë me fshatin, se ne fshatin e kemi prioritet të planit tonë dhe 100 milionë euro në vit do t’i ndajmë për subvencione, domethënë në bazë të prodhimit që bën do merrni para nga shteti për të paguar të gjitha këto që thua ti, fidanët, plehrat, dapi që the. Do t’i ndihmojë të gjithë njerëzit punëtorë të këtij vendi e në veçanti nënat punëtore si ty. Siç po largohet dimri, do të largojmë edhe të keqen me 25 Prill”, tha Basha.
