Kolegji i Posaçëm i Apelimit ka rrëzuar vendimin e Komisionit të Pavarur të Kualifikimit dhe ka rikthyer në detyrë prokurorin e Prokurorisë së Përgjithshme, Arqilea Koça.
Vendimi është marrë këtë të martë nga trupi gjykues i KPA i përbërë nga Ardian Hajdari kryesues, Sokol Çomo relator, Albana Shtylla, Natasha Mulaj, Rezarta Schuetz, anëtarë.
Përmes një njoftimi për mediat, KPA e ka cilësuar shkarkimin e Arqilea Koçës të padrejtë, ndaj urdhëron rikthimin e menjëhershëm në detyrë pranë prokurorisë së Përgjithshme.
“Trupi gjykues i Kolegjit të Posaçëm të Apelimit, i përbërë nga Ardian Hajdari kryesues, Sokol Çomo relator, Albana Shtylla, Natasha Mulaj, Rezarta Schuetz, anëtarë, shpalli sot vendimin për çështjen (JR) nr. 25/2019, datë 20.05.2019, që i përket ankimit të paraqitur nga subjekti i rivlerësimit Arqilea Koça kundër vendimit nr. 113, datë 08.03.2019, të Komisionit të Pavarur të Kualifikimit.
Në përfundim të gjykimit, bazuar në nenin 59, pika 1 dhe 66, pika 1, shkronja “b” e ligjit nr.84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, trupi gjykues, me shumicë votash, vendosi:
1.Ndryshimin e vendimit nr.113, datë 08.03.2019 të Komisionit të Pavarur të Kualifikimit, që i përket subjektit të rivlerësimit Arqilea Koça dhe konfirmimin e tij në detyrën e prokurorit pranë Prokurorisë së Përgjithshme.
2.Ky vendim është përfundimtar dhe ka efekt të menjëhershëm
U shpall sot, në Tiranë, më datë 15.12.2020″, thuhet në njoftim.
Koça ishte shkarkuar nga KPK në seancën e datës 8 Mars të vitit 2019. Koça është subjekti i 3 që rikthehet në detyrë nga KPA, pasi më parë janë rikthyer Fuat Vjerdha dhe Ervin Gogaj./Opinion.al
