Sekretari i Përgjithshëm i Partisë Demokratike, Gazmet Bardhi ka reaguar për vrasjen 25-vjeçarit, Klodjan Rasha nga një efektiv i forcave “Shqiponja” në orët e para të mëngjesit të sotëm në rrugën “Dritan Hoxha”.
Nëpërmjet një postimi në “Facebook”, Bardhi shprehet se është duke ndodhur e njëjta gjë si 30 vite më parë, i njëjti model, thjesht ekzekutorët kanë ndërruar emra.
Duke e “zhveshur” nga faji efektivin e policisë, Gazment Bardhi fajson kryemionistrin Edi Rama dhe ministrin Sandër Lleshajn. Ndër të tjera ai shton se Policia e Shtetit është miqësuar me bandat dhe armiqësuar me qytetarët e thjeshtë.
“Para 30 viteve rininë e rrihte, persekutonte dhe vriste Gramoz Ruçi, sot e dhunon, gjobit dhe vret Edi Rama dhe Sandër Lleshaj. Kanë ndryshuar vetëm emër, por jo model! Vrasja e një të riu 25 vjeçar, vetëm se nuk i ndaloi Policisë për vendosjen e maskës dhe orarin e ndalimit të lëvizjes, është shokuese. Të dhënat e para për vrasjen e një 25 vjeçari në mes të Tiranës nga Policia e Shtetit hedhin dyshime të forta për vrasje me dashje pa asnjë shkak. Njoftimet zyrtare të Policisë së Shtetit qartazi krijojnë bindjen e tentativës për manipulimin dhe fshehjen e së vërtetës, me justifikime qesharake të denja për një bandë. Prokuroria duhet të ndërmarrë menjëherë masat për ndalimin e manipulimit të ngjarjes dhe zbardhjen e të vërtetës. Secili prej nesh pret drejtësi për këtë akt kriminal të pashembull dhe i shpreh ngushëllimet më të sinqerta familjes. Policia që vret një të ri në Ditën e Rinisë është modeli më i keq i Policisë së Shtetit. Sot vrasësi i të riut nuk është efektivi i policisë, por Edi Rama dhe Sandër Lleshaj, me politikën e tyre qeveritare të armiqësimit të Policisë me qytetarët dhe miqësimit të Policisë me bandat. Është irrituese që në 8 vite Edi Rama ndërtoi modelin e Policisë që nuk lufton krimin, por burgos, gjobit dhe vret qytetarët e pambrojtur. Është e paprecedentë që në 8 vite në vend të komunikatave të përditshme sesa grupe kriminale ka zbuluar dhe arrestuar, Policia e Shtetit është fokusuar vetëm tek informacioni i përditshëm sesa gjoba i ka vendosur qytetarëve. Kjo nuk është arsye se përse ekziston Policia e Shtetit. Kjo është një politikë e gabuar, që e armiqëson Policinë me qytetarët dhe e miqëson me bandat. Kjo duhet të marrë fund menjëherë!“shprehet Bardhi.
Më herë u informua se efektivi i policisë u arrestua, ndërkohë vrasja e të riut është ende e paqartë, pasi më herët u raportua se ai ishte i armatosur. Kjo gjë u mohua me bindje nga familjarët e tij, të cilët shtuan se 25-vjeçari kishte dalë për kafe./ Opinion.al
