“Duhet në mënyrë absolute të shpëtoni Alexei Navanly, jo vetëm sepse është një opozitar në Rusi. Falë tij janë ngritur hetime. Ka nxjerrë dokumente të rëndësishme mbi korrupsionin në Rusi. A do të ketë një tjetër si ai në atdheun tim?”, kështu është shprehur në një intervistë për “Sky News Uk” Marina Litvinienko, e veja e Alexander, ish-agjenti rus i vrarë në Londër në vitin 2006.
“Të gjithë e kanë kuptuar se kur Navalny ndodhej në Rusi ai ishte i rrezikuar. Tani që është në Berlin është pak më i sigurt. Por nuk besoj se duhet ta lëmë. Ne ende nuk e dimë se çfarë i ka ndodhur Alexeit”, ka thënë Marina Litvinienko, duke shtuar se nuk besonte që mjekët rusë ishin të lirë të thonin atë që mund të kishin zbuluar.
Për më tepër në rastin e të shoqit, Marina ka thënë se: “Për dy javë nuk u kuptua çfarë i kishte ndodhur. A mund t’ju vëmë faj mjekëve britanikë? Sigurisht që jo. Askush më parë nuk ishte helmuar me polonium radioaktiv”, është shprehur ajo duke shtuar se vetëm kur të kuptohet se çfarë i ka ndodhur Nalvalnyt, mund të kuptohet kush ka dashur ta vrasë./Opinion.al
