Zv. Ministrja e Shëndetësisë Mira Rakacolli ka informuar mbi situatën Covid -19 në vend. Ajo tha se situata epidemiologjike në vend në javën e fundit paraqitet e qendrueshme, ndërsa mesatarja e rasteve ditore është 145.
Duke folur për rritjen e numrit të testimeve, Rakacolli u shpreh se: “Në testimet përfshihen testimet në strukturat publike dhe rastet për konfirmim diagnoze që rezultojnë të dyshuara ose pozitive në strukturat jopublike të liçensuara, sipas vlerësimit të IShP”.
Ndërkohë duket se ka një shtim të lehtë të numrit të pacientëve të shtruar në spitale, ku aktualisht në spitalin Infektiv dhe “Shefqet Ndroqi” po trajtohen 141 pacientë të konfirmuar pozitivë me COVID-19, (137 ishin një ditë më parë) 20 në terapi intensive nga të cilët 9 pacientë janë të intubuar, nga 7 që ishin dje.
“Ju informojmë se në dy spitalet COVID janë gjithashtu duke marrë shërbime të specializuar dhe 34 qytetarë të cilët kanë qenë pozitivë me COVID-19 dhe aktualisht janë negativizuar, por po vijojnë të marrin trajtim spitalor për pasojat e sëmundjes. Ndërsa vijojnë të trajtohen edhe pacientë të dyshuar për COVID19, sipas protokolleve përkatëse”, njofton Ministria e Shëndetësisë./Opinion.al
