Një nga ekspertët kryesorë për koronavirusin në Shtetet e Bashkuara, Anthony Fauci, tha se është optimist se vaksina kundër COVID-19 mund të gjendet në kohë rekord.
Duke folur në një intervistë për Zërin e Amerikës, Faucci, drejtor i Institutit Kombëtar të SHBA-së për Alergji dhe Sëmundje Infektive, tha se provat e hershme të disa vaksinave kanë qenë pozitive.
Kompania amerikane Moderna ka testuar tashmë një vaksinë eksperimentale dhe ka thënë se ajo ka dhënë shenja premtues.
“Po, jam optimist se do të kemi vaksinë brenda një periudhe të arsyeshme kohore, jo vetëm nga kompania Moderna, por edhe nga të tjera. Jemi të përfshirë në bashkëpunim me disa kompani. Arsyeja që jam optimist është se në provat e hershme te njerëzit dhe te kafshët, rezultatet kanë qenë të favorshme”, tha Faucci.
“Nëse kemi vaksinë të suksesshme, mendoj se shumica e njerëzve do ta marrin, qoftë përmes zyrës së mjekut të tyre, përmes farmacive apo qendrave të shpërndarjes”, shtoi ai.
Dhjetëra kompani farmaceutike janë në garë për gjetjen e vaksinës kundër koronavirusit, i cili ka prekur mbi 7.4 milionë njerëz në botë./Opinion.al
