Më herët u njoftua se Presidenti Ilir Meta ka zhvilluar një bisedë telefonike me Zv.Ndihmës Sekretarit të Shtetit të SHBA, Matthew Palmer. Mësohet se gjatë kësaj telefonate, është folur në lidhje me situatën politike në vend si dhe për ngërçin e krijuar në Gjykatën Kushtetuese.
Përmes një postimi neë rrjetet sociale, zëdhënësi i Presidencës, Tedi Blushi, shprehet se është i gatshëm që të publikoj telefonatën mes Metës dhe Palmer. Për këtë, Blushi ka thënë se nëse zëdhënësi i ambasadës amerikane, Guri Lekloti është dakord për publikimin e bisedës, Presidenca do e vërë në dispozicion të qytetarëve.
Postimi i plotë:
Interesimit tuaj për një lajm, që siç më vutë në dijeni, ja u ka konfirmuar z.Guri Lekloti dhe ju ka sugjeruar t’ja u konfirmoj edhe unë, ju sqaroj : Po, është e vërtetë që mbrëmjen e djeshme ka patur një bisedë telefonike rreth 30 minuta mes Presidentit të Republikës, Sh.T.Z Ilir Meta dhe Zv.Ndihmës Sekretarit të Shtetit të SHBA, z.Matthew Palmer, me kërkesë të këtij të fundit.
Qëndrimet e Presidentit Meta të shprehura gjatë kësaj bisede telefonike kanë qenë mjaft të qarta, transparente dhe shteruese.
Megjithatë nëse z.Lekloti, bie dakord me ambasadën e SHBA në Tiranë, dhe na autorizon ta publikojmë të plotë transkriptin e kësaj bisede telefonike, ne jemi gati ta vëmë atë të plotë në dispozicion të opinionit publik vendas dhe ndërkombëtar.
Presidenti Meta nuk ka asgjë për të fshehur! Konfirmojmë se marrëdhëniet tona strategjike me SHBA janë të forta, të qëndrueshme dhe transparente, si asnjëherë!/Opinion.al
