Kreu i opozitës Lulzim Basha i bëri thirrje sot socialistëve që të reflektojnë pasi gjendja politike dhe ekonomike për shumicën e shqiptarëve është bërë e padurueshme kështu që vendit i duhen zgjedhjet e parakohshme për ti kthyer legjitimitetin parlamentit dhe qeverisë sipas tij.
Këtyre deklaratave të kreut demokrat i është përgjigjur në rrjetet sociale Elisa Spiropali. Ajo ka përjashtuar çdo mundësi për kërkesën për zgjedhjet të parakohshme duke thënë se opozita nuk ka “shans gjithashtu, të grisin kontratën tonë me qytetarët”.
Sipropali shton se mazhoranca nuk ka kohë për të humbur me Lulzim Bashën dhe konfirmon qëndrimin e qeverisë se brenda dhjetorit do të votojnë Reformën Zgjedhore sipas rekomandimeve të OSBE/ODIHR-it.
“Qeveria dhe shumica jonë e votuar për të qeverisur 4 vjet, kanë shumë detyra e punë për të realizuar deri në përfundim të mandatit, në respekt të kontratës me shqiptarët. Ata që e grisën kontratën me zgjedhësit e tyre, nuk kanë asnjë të drejtë po as edhe një shans gjithashtu, të grisin kontratën tonë. Ne po përgatitemi për dy sezone të reja betejash në çdo drejtim dhe për një Shqipëri më të mirë në çdo fushë të jetës. Nga ana tjetër, sa më shumë Lulzim Basha dhe shumica e tij imagjinare refuzojnë dialogun për reformën zgjedhore, aq më pak kohë kemi ne për të humbur me ta. Brenda dhjetorit do te votojme Reformën Zgjedhore sipas rekomandimeve të OSBE/ODIHR dhe do të vazhdojmë më tej me pikat kyçe të procesit të integrimit europian, duke përdorur si hartë drejtuese rezolutën e Bundestagut, si edhe të gjitha pikat e tjera të programit tonë për Shqipërinë që duam”, shkruan Spiropali./Opinion.al
