Kryeministri Edi Rama ka mbledhur këtë të hënë grupin parlamentar socialist.
Bëhet me dije se një nga temat e takimit ka qenë çështja e shkarkimit të Presidentit Meta. Partia Socialiste ka vendosur që të pritet publikimi i raportit përfundimtar të Venecias dhe duke iu referuar atij do të hartohet një dokument shpjegues me hapat që do të ndiqen.
Në draftin paraprak që u publikua pas përfundimit të mbledhjes së Komisionit të Venecias, Kuvendi këshillohej që mos të zhvillonte seancë për shkarkimin e presidentit pasi sipas opinionit të tyre veprimet e tij nuk e justifikonin nisjen e procedurës për shkarkim.
Kryeministri Rama ka deklaruar më herët se Presidenti Meta e ka shkelur Kushtetutën por sipas tij do të jetë në dorë të Komisionit të posaçëm që heton veprimet e Presidentit nëse do të kërkohet ose jo shkarkimi i tij.
Në mbledhjen e sotme kreu i qeverisë u ka kërkuar deputetëve socialist edhe miratimin sa më shpejt të paketës anti- shpifje. Kjo paktë mes të tjerave autorizon AMA-n që të mbikëqyrë edhe median elektronike, duke përfshirë edhe publikimet online. /Opinion.al
