Mazhoranca qeverisëse nuk humb kohë! Sipas ministres së Shtetit, Elisa Psiropali të enjten Parlamenti do të fillojë procedurat për shkarkimin e Ilir Metës, si president i Republikës.
Pas mbledhjes së Kryesisë së Partisë Socialiste, Spiropali do të deklaronte se me vendimin e tij, për anulimin e datës së zgjedhjeve lokale, Ilir Meta ka sulmuar brutalisht Kushtetutën.
“Të enjten në seancë plenare të zhvillohet një debat i gjatë parlamentar duke shtjelluar të gjithë argumentet se si Ilir Meta ka sulmuar brutalisht Republikën dhe ka shpikur një institucion të padëgjuar. I takon Kolegjit Zgjedhor apo Komisionit Qendror të Zgjedhjeve që ta shqyrtojë juridikisht këtë vendim”, tha Spiropali.
“Ilir Meta e ka humbur të drejtën për të qëndruar në atë pozicion, dhe Parlamenti do të nisë procedurat e shkarkimit të Presidentit. Sigurisht që do të jetë Gjykata Kushtetuese që do të marrë vendimin përfundimtar, po kjo nuk na pengon që të nisim procedurat”, theksoi më tej Spiropali.
Pasi tërhoqi dy ditë më parë dekretin për zgjedhjet lokale të 30 qershorit, Presidenti Ilir Meta doli në një konferencë për mediat këtë të hënë, për të dhënë arsyet e këtij vendimi.
Meta u shpreh se zgjedhjet nuk mund të jenë një ditë përçarje. Ai tha se Kushtetuta i jep të drejtën vetëm Presidentit të caktojë datën e zgjedhjeve.
“Jam sot para jush për shfuqizimin e dekretit për datën 30 qershor për zgjedhjet lokalet. Presidenti i Republikës është i vetmi organ që mund të vendosi datën e zgjedhjeve. Kushtetuta përcakton se Presidenti përcakton datën e zgjedhjeve. Sipas Kushtetutës, pa pasur një datë nga Presidenti, zgjedhjet nuk mund të zhvillohen. Partitë politike të opozitës nuk janë regjistruar për zgjedhjet lokale. Zgjedhjet nuk mund të jetë një ditë përçarje. Kjo ka bërë që jeta politike parlamentare të pësojë një krizë përfaqësimi. Shqipëria po kalon edhe një krizë kushtetuese. Së fundmi edhe Gjykata e Lartë ka dalë jashtë funksioni”, tha Meta.
“Ekziston rreziku real që Shqipëria mund të shkojë drejt tensionit social dhe si kreu i shtetit e konsideroj këtë si rrezik serioz. Detyra primare kushtetuese e Presidentit është të garantojë unitetin e popullit. Organizimi i zgjedhjeve të lira është baza e një shoqërie demokratike. Realizimi i zgjedhjeve lokale, pa garë dhe pa pjesëmarrjen e opozitës, është problematik.”
Ndër të tjera, Meta u shpreh se data tjetër për zgjedhjet lokale do të përcaktohet me dakordësinë e palëve./ Opinion.al
