Faqja e njohur ‘Billboard” i ka dedikuar një shkrim 5 artisteve me origjinë shqiptare Dua Lipa, Rita Ora, Bebe Rexha, Ava Max dhe Njomza ku përshkruan arritjet e tyre në krye të klasifikimeve në lista të shumta botërore, nominime në kompeticione të rëndësishme duke thënë se prejardhja e tyre shqiptare ka patur ndikim tek to, për të arritur aty ku janë sot.
Në dhjetor të vitit 2018 këngëtarja me origjinë shqiptare Bebe Rexha publikoi një foto të sajën me këngëtaren Dua Lipa dhe krahas saj shkruante. “Dy shqiptare të nominuara për dy Grammy. Për të gjithë vajzat shqiptare dhe të gjithë vajzat e botës, asgjë nuk është e pamundur, kështu që nisni të ndiqni ëndrrat tuaja,”-përfundon shkrimi i Bebes. Në janar të këtij viti Bebe bëri një tjetër postim ku shkruante: “Dua një bashkëpunim me Dua Lipën, Rita Orën dhe Ava Max.”
Ndërkohë ajo ka thyer rekorde duke qenë në vend të parë në top listën “Hot Country Songs” me këngën ‘Meant to Be”. Ndërsa Lipa ka kryesuar për 4 javë listën “Mainstream top 40” me këngën “New Rules”, Rita Ora ka patur dy këngë të vendosura në Top 10 për “Dance Club Songs”, ndërsa Ava Max me këngën “Sweet but Psycho” hyri në ‘Hot 100’.Të katërta këto artiste kanë prindër shqiptar ndonëse kanë lindur në vende të ndryshme, Rita Ora në Kosovë , Bebe Rexha në Brooklyn, Dua Lipa në Londër dhe Ava Max në Milwaukee. Ndërkohë një tjetër shqiptare shumë e talentuar është edhe tekst-shkruesja Njomza, e cila është bashkëautore në disa nga këngët më të suksesshme të Ariana Grande si “Thank U”, “Next” dhe “7 Rings”.
E lindur në Gjermani dhe e rritur në Chicago, ajo është shprehur se kalimi i Shqipërisë nga diktatura në demokraci në vitet 90-të ka sjellë gjithë këtë krijimtari tek brezi i saj. “Nëse kemi diçka që na çon të bëjmë këtë që po bëjmë është për shkak të ambicies që kemi si vend”,-është shprehur Njomza. Gjithashtu ajo ka shtuar se rrymat më të përdorura në Shqipëri janë muzikë elektronike, pop dhe rrok. Muzika elektronike është rrymë e re në Shqipëri e vendosur pas regjimit komunist.
Ajo shtoi se jo vetëm artistët me origjinë shqiptare që janë jashtë shtetit janë të suksesshëm, por gjithashtu edhe artistë që jetojnë në Shqipëri, pasi këndojnë kudo në Evropë. “Shqipëria është një vend që po përparon,”-ka thënë Njomza. Ndërkohë Ava Max në një intervistë është shprehur: “Nëna ime që thoshte gjithnjë që jemi kështu sepse jemi shqiptarë. Jemi pak të çmendur dhe nuk heqim kurrë dorë. Është në gjakun tonë,”-përfundon Ava Max./Opinion.al/
(Përshtatur në shqip nga Billboard.com)
