Presidenti serb Aleksandër Vuçiç i është drejtuar kombit serb menjëherë pas mbledhjes së Këshillit Kombëtar për Sigurinë dhe arrestimin e Marko Gjuriç në Kosovë e ka quajtur provokim brutal dhe akt kriminal që autoritetet e Prishtinës, kanë zhvilluar të ndihmuar nga ndonjë shtet perëndimor.
Ai i ka quajtur terroristë shqiptarët që po ndihmohen nga Perëndimi.
“Unë do t’ju njoh me provokimin brutal, aktin e marrëzisë dhe veprën penale që kanë kryer autoritetet e Prishtinës në Kosovë dhe Metohi. Është interesante që të gjitha mediat donin të na tregojnë ne faktin se Gjuriç nuk respektoi procedurat e dakorduara për hyrjen në Kosovë dhe u arrestuan”,- shpjegoi Vuçiç dhe më pas lexoi në konferencë për mediat Marrëveshjen e Brukselit që i referohet procedurës për regjistrimin e hyrjes në territorin e Kosovës.
Ja pamjet nga momenti i arrestimit të zyrtarit serb, Marko Gjuric në Mitrovicë
Pas arrestimit në Mitrovicë të drejtorit të së ashtuquajturës “Zyrë për Kosovën e Metohinë” në Qeverinë e Serbisë, Vuçiç ka komunikuar me presidentin rus Vladimir Putin, nga i cili pret përkrahje për zgjidhjen e situatës kritike. Të paktën kështu raportojnë mediat në Beograd.
Reagon BE pas arrestimit të zyrtarit serb
Zëdhënësja e Bashkimit Europian, Maja Kocijançiç, tha për BIRN se thirrja e BE-së për autoritetet e të dyja palëve, Kosovës dhe Serbisë, është që të tregojnë përmbajtjen dhe maturinë e nevojshme në mënyrë që situata në teren në Kosovë të mos eskalojë më shumë.
Komenti i saj erdhi pasi njësitet speciale të Policisë së Kosovës arrestuan shefin e Zyrës për Kosovën në qeverinë e Serbisë, Marko Gjuriç për hyrje ilegale në Kosovë.
“Të gjitha çështjet e shqetësimit të dyanshëm duhet të adresohen brenda kornizës së dialogut të lehtësuar nga BE, i cili është synimi përfundimtar në normalizimin e marrëdhënieve ndërmjet Kosovës dhe Serbisë”, – u shpreh Maja Kocijançiç.
Ajo shtoi se BE “shpreh keqardhje për ngjarjet e sotme, të cilat shkojnë në të kundërtën e normalizimit të marrëdhënieve”.
“Ne presim që edhe Serbia, e cila është në bisedimet për anëtarësim në BE, edhe Kosova, e cila është në proces të zbatimit të Marrëveshjes për Stabilizim Asocim, t’i respektojnë në tërësi, në letër dhe frymë, marrëveshjet e arritura ndërmjet vete në dialog”, – u shpreh Maja Kocijançiç.
Veseli: Serbia të kuptojë se ky vend ka zot shtëpie
Ndersa Kryetari i Kuvendit të Kosovës, Kadri Veseli reagoi për arrestimin e Marko Gjuriç në Mitrovicë duke theksuar se Kosova zbatoi sot ligjet e veta dhe ushtroi sovranitetin e plotë.
Sipas Veselit, Serbia duhet të kuptojë se ‘ky vend ka zot shtëpie’.
Kryeparlamentari shprehet se zyrtarët serbe duhet të kuptojnë se në Kosovë mund të futen vetëm me lejen e autoriteteve kosovare.
Reagimi i Thaçit: Gjuriç kishte hyrë në mënyrë të paligjshme
Presidenti i Kosovës, Hashim Thaçi, ka bërë thirrje për qetësi.
“Marko Gjuric ka hyrë në Kosovë në mënyrë të paligjshme. Policia e Kosovës ka vepruar në përputhje me kompetencat e veta, me profesionalizëm dhe në mbrojtje të rendit dhe ligjit në Kosovë”, është shprehur presidenti Thaçi.
Ai ka thënë se sapo është njoftuar nga organet kompetente dhe Marko Gjuric ka kaluar nëpër procedurën e rregullt të Prokurorisë dhe Gjyqësisë, si dhe tani është duke u përcjellë nga Policia e Kosovës në pikën kufitare në mes Kosovës dhe Serbisë.
