Ish-nënkryetari i Partisë Demokratike, Astrit Patozi, është shprehur të mërkurën pasdite se thirrjet e ish-kryetarit Sali Berisha për ulje mes palëve në PD, po bien në ‘vesh të shurdhër’ nga Lulzim Basha.
“E kam dëgjuar shpesh zotin Berisha që të bëjë shpesh thirrje për palët. E kam dëgjuar edhe në ekranin tuaj ku ka ardhur shpesh. Kam përshtypjen se ai i drejtojet zotit Basha me këto thirrje”,-tha Patozi.
Sipas tij, nëse Berisha do pranonte një sugjerim, do t’i kërkonte që të mos e bënte më një gjë të tillë, pasi nuk do ishte mirë që të përsëriste vetveten për të rënë në ‘vesh të shurdhër’ të Lulzim Bashës.
Ai deklaroi se nuk është mirë që një lider historik të përsërisë të njëjtën gjë dhe të mos dëgjohet nga Lulzim Basha.
“Unë e konsideroj të qëllimshme mënyrën se si Lulzim Basha i bëri gjërat në PD. Lulzim Basha e konsideron PD-në një parti private. Unë them se kjo një parti është shoqëri aksionere ku kryetari është aksioneri më i madh, por jo pronari i saj”– u shpreh Patozi.
