Tre muaj pasi dha dorëheqjen nga drejtimi i Kombëtares shqiptare, Xhani De Biazi do të rikthehet të drejtojë një ekip futbolli. Madje, në një nga kampionatet më të rëndësishëm në arenën europiane. Bëhet fjalë për ekipin e Alaveshit në Spanjë, që pas 5 ndeshjesh nuk ka arritur të marrë asnjë pikë, madje as të shënojë.
Pasi shkarkuan trajnerin pak ditë më parë, kanë zgjedhur ish-trajnerin e Kombëtares shqiptare për t’i kërkuar një mrekulli. Ajo që bëri me kuqezinjtë u konsiderua vërtet e tillë dhe, për këtë fakt, drejtuesit e skuadrës spanjolle mendojnë se 61-vjeçari është njeriu i duhur për të rikthyer harmoninë, disiplinën dhe, mbi të gjitha, rezultatet pozitive.
De Biazi u zyrtarizua mbremjen e djeshme si trajneri ri i Alaveshit. Kjo është hera e dytë që italiani rikthehet në Spanjë, pasi më parë ka stërvitur ekipin e Levantes.
KUSHTET
Do të ishte diçka spektakolare nëse De Biazi do të debutonte ditën e sotme me Realin e Madridit (ose ndoshta jo, sepse madrilenët e uritur duan vetëm të fitojnë), por italiani do të jetë në stadium për ta parë ndeshjen si tifoz i Alaveshit. Në këtë 90- minutësh, ai do të ketë mundësinë të njohë më mirë problemet, të krijojë një ide mbi skuadrën, vendosjen taktike dhe mbi pikat e dobë- ta në të cilat duhet të punojë.
Ai firmosi nje kontrate qe e mban te lidhur deri në përfundimin e sezonit, me opsion për ta rinovuar edhe për vitet e ardhshme. Sigurisht që kushti kryesor është të shpëtojë skuadrën, e cila gjendet në vendin e parafundit me 0 pikë dhe 0 gola të shënuar. Interesant është fakti që De Biazi në aventurën e dytë në Spanjë duhet të heqë dorë nga 3% e pagës që do të përfitojë tek Alaveshi.
Sipas rregullave në futbollin spanjoll, kjo vlerë është e detyrueshme për të gjithë trajnerët, qofshin këta spanjollë apo të huaj dhe shërben si një formë rikompensimi për një “kurs” që duhet të bëjnë trajnerët në Spanjë. Ata që kanë licencën e trajnerit nuk kanë përse të bëjnë këtë lloj kursi, por thjesht të lënë 3% të pagës së tyre, e cila nuk është e përcaktuar fiks, por mund të diskutohet.
SHQIPËRIA – Xhani De Biazi nuk e harron kurrë atë që bëri me Shqipërinë dhe e konsideron si një nga momentet më të bukura të karrierës së tij. Në një intervistë të dhënë për “Corriere Della Sera” ai kujton momentet e para në Tiranë, por thotë se u largua nga Shqipëria për shkak se cikli përfundoi.
“Nuk e di se kush është njeriu që arriti të bënte mrekullinë me Shqipërinë. Ndoshta është ndonjë alien. Në fakt, me Shqipërinë arrita një objektiv që në fillim dukej realisht i pamundur, që do të thotë kualifikimi për në Europian. Sfiduam çdolloj parashikimi dhe kam provuar një ndjenjë të mrekullueshme”, tha De Biazi. Më pas tregon kujtimet dhe largimin nga kuqezinjtë.
“Mbrëmjen e parë në hotel vendosa karrigen pas derës së dhomës sepse kisha frikë mos më vidhnin. Tani e them duke qeshur, sepse me kalimin e kohës mësova t’i dua shqiptarët. Largimi? Kuptova që e kisha mbyllur ciklin tim dhe mendova të largohesha në momentin më të mirë të mundshëm dhe jo për krizë rezultatesh.
Mendoj se trajneri Panuçi do të bëjë mirë dhe do të punojë seriozisht me këtë grup. Jemi takuar disa herë me njëri-tjetrin dhe dua t’i them që të vazhdojë rrugën e nisur me qetësi, pa i djegur etapat. Duhet t’i ngjisë shkallët një e nga një”, përfundoi De Biazi.
