Ditën e sotme punonjës të policisë shkuan në zyrën ku ndodhet gazeta “Koha Jonë” me pretendimin se këtu ishin vendosur disa shkallë emergjence pa lejen përkatëse. Më pas Policia ka thirrur në Komisariat pronarin e Gazetës ‘Koha Jonë’ Nikoll Lesin i cili është mbajtur rreth dy orë në komisariat ku edhe ka dhënë dëshminë e tij. Për këtë ngjarje ka reaguar edhe LSI.
Nënkryetari i LSI-së, Luan Rama në një dalje publike nga selia e partisë së tij ka denoncuar sot ngjarjen që ndodhi tek gazeta ‘Koha Jonë’.
Reagimi i plote i LSI
“Në emër të LSI jam këtu për t’u solidarizuar me gjithë ekipin dhe drejtuesin e ‘Koha Jonë’, duke i mbështetur. Dëshiroj të denoncoj si një akt të papërgjigjshëm dhunën shtetërore ndaj ‘Koha Jonë’. Kjo është shprehja më domethënse si dëshmi e degradimit të këtij pushteti”, tha Luan Rama.
Ndër të tjera, Luan Rama i bëri thirrje Ramës të distancohet nga ky akt dhe të marrë të gjitha masat ndaj përgjegjësve, pasi sipas tij çdo pushtet që ka provuar të ushtrojë dhunë ndaj fjalës së lirë gjithmonë ka humbur.
“Ky është një akt i papërgjegjshëm dhunë shtetërorë ndaj pronarit dhe punonjësve të ‘Koha Jonë’ dhe si dëshmi e degradimit të këtij pushteti. Arbitrariteti dhe arroganca është një akt i shëmtuar, sidomos kur bëhet ndaj fjalës së lirë është një arrogancë kriminale. Veprimi i Policisë së Shtetit është në kundërshtim me ligjin dhe i bëj thirrje Ramës të distancohet nga ky akt dhe të marrë të gjitha masat për të ndëshkuar fajtorët dhe prokuroria të zbardhë të vërtetën në mbrojtje të së drejtës së informimit dhe të fjalës. Çdo pushtet që ka provuar të ushtrojë dhunë ndaj fjalës së lirë gjithmonë ka humbur. Kryeministri të distancohet dhe të mbajë qëndrim të prerë ndaj kujtdo që ka ushtruar dhunë policore ndaj gazetës ‘Koha Jonë’. Kjo është dhunë ndaj fjalës së lirë.”- tha Rama.
Sa i përket pyetjes për kabinetin qeveritar, Luan Rama tha se ajo nuk përbën surpriza dhe do të shprehen në sesionin parlamentar për të.
“Jo si drejtues i LSI por edhe si gazetar, prisja që meraku juaj të fokusohej tek meraku jonë i përbashkët për dhunën ndaj fjalës së lirë. Për qeverinë dhe përbërjen e saj në do jemi së shpejti në sesionin e ri të Kuvendit dhe do shprehemi atje. Përkundrejt opinioneve të shprehura dëshiroj të theksoj se për mua nuk përbën asnjë surprizë dhe është në thelb shprehja ‘Rilindja e Rilindur’ më kriminale ndaj ‘Koha Jonë’.
Lidhur me këtë ngjarje, policia shoqëroi në komisarit e Tiranës drejtuesin e gazetës, Nikoll Lesi, i cili dha dhe dëshminë e tij para oficerëve.
