Në vazhdën e mesazhe dhe urimeve që i vijnë Presidenti të ri Ilir Meta është edhe ajo e Presidentit të Turqisë, Recep Tayyip Erdogan.
Zyra për mediat në Presidencë, publikon mesazhin e Erdoğan, me rastin e marrjes së detyrës nga Meta.
“Në emrin tim dhe të Popullit tim, ju uroj nga thellësia e zemrës për detyrën e re si President i Republikës së Shqipërisë. Kam besimin e plotë që, ashtu si gjatë detyrës suaj si Kryetar i Kuvendit të Shqipërisë, edhe gjatë detyrës si President i Republikës së Shqipërisë, do të vazhdojnë përpjekjet Tuaja të vyera për thellimin më tej të marrëdhënieve tradicionale vëllazërore, mike dhe në çdo fushë ndërmjet dy vendeve tona. Dëshiroj të theksoj kënaqësinë time ndërsa shoh zhvillimet që ka bërë Shqipëria në rrugën drejt integrimin evropian, si dhe përparimet që ka bërë në fushën e demokracisë dhe të zhvillimit. Mbështetja e Turqisë për Shqipërinë në këtë rrugë do të vazhdojë”, – shkruan Presidenti i Turqisë në mesazhin e tij drejtuar Presidentit Meta.
