Lideri demokrat Lulzim Basha duke folur nga çadra e protestës paraditen e sotme, iu përgjigj akuzave të mazhorancës se bojkoti i parlamentit ka për qëllim të bllokojë vetingun. “Ne jemi dakord me reformën në drejtësi dhe u investuam për një reformë cilësore dhe e votuam në korrik 2016”, tha Basha. Sipas tij, PD është pro vetingut, por me kusht që të njerëzit që do ta bëjnë, të mos emërohen nga Rama por të zgjidhen.
Basha: “Sot për këto institucione të reja të drejtësisë kjo maxhorancë që e ka frikë reformën në drejtësi propozon 29 kandidatë për 27 pozicione, pra nuk ka zgjedhje ka emërime. Edi Rama dhe Ilir Meta duan t’i emërojnë vetë në vend që t’i lënë vendin më të mirëve, më të pakorruptuarve. A mund ta pranojmë këtë ne, a mund të pranoni një drejtësi të kapur nga Edi Rama? Kujt i shërben një drejtësi e kapur nga Edi Rama? Nuk mund ta pranojmë. Po nëse janë ata që nuk kanë frikë nga vettingu u them se menjëherë pas paktit për një qeveri të vullnetit të mirë për zgjedhje të lira dhe korrigjimit të 7 ligjeve, urdhëroni ta bëjmë vettingun e të shohim kush ka frikë nga drejtësia e pavarur”, deklaroi Basha.
Ai kërkoi që maxhoranca ti hapë rrugë qeverisë teknike e të ndryshojë shtatë ligjet, atëherë opozita do të jetë aty. Në të kundërt, për Bashën kjo çështje do të zgjidhet me qytetarët.
