Dy javë pas ngjarjes së Durrësit ku një vajzë e mitur 11 vjeçe u mor peng nga kushëriri i saj me probleme mendore, flet nëna e personit të akuzuar. 77 vjeçarja mohon pengmarrjen dhe akuzon babain e vajzës se denoncoi të birin padrejtësisht. Sipas saj, ai ka pirë birra me policët pas ngjarjes.
Shahe Kabashi, nga fshati Rrashbull i Durrësit, deklaron se “nuk është e vërtetë që Arbeni e mori peng vajzën që e kemi gjakun tonë, por e kërkoi të vinte në shtëpi që t’i lidhte fishat e kompjuterit”. Më tej tregon: “Nipi im, babai i vajzës lajmëroi policinë për pengmarrje. Pastaj piu birra dhe qerasi policët, të cilët më shkatërruan shtëpinë dhe djalin për pak e dogjën të gjallë”
Zonja Shahe, çfarë ndodhi atë ditë?
Si ta harroj atë ditë, që nënë mos qofsha e gjallë të jem. Që në mëngjes Beni shkoi poshtë në dyqan e bleu një kartë, mbushi telefonin. Donte të fliste me vëllezërit e tij në Angli. U kthye lart në shtëpi dhe shkoi tek nipi e i tha vajzës së vogël të tyre që ta ndihmonte të rregullonte fishën e kompjuterit se donte të fliste me Ymerin ne Angli. Vajza erdhi dhe aty në dhomë me kompjuterin po merrej.
Po ju ku ishit ? Çfarë lidhje keni me familjen e vajzës?
Në shtëpi, po bëja mëngjesin të hanim. Unë e kam vajzë vëllai, nënën e vajzës së vogël, gjakun tim, ndërsa të shoqin e kam po nip nga burri, djem xhaxhallarësh janë me fëmijët e mi. Vajza në kompjuter ishte, lëvizte atje çfarë shikonte. Ne u tromaksëm kur pamë që për pesë minuta ishte rrethuar shtëpia nga 20 policë. Beni po priste që të rregullohej kompjuteri.
Po më pas çfarë ndodhi?
Kur u rrethua shtëpia nga policia djali u tremb jashtëzakonisht shumë. Beni gjysmë njeriu ishte, tani me atë që bënë e lëvizën mendsh fare. Ai ka vuajtur 22 vjet në burg në Itali. Kur policia rrethoi shtëpinë, mori thikën e bukës dhe donte të vriste veten. Ai i sëmurë është, por pse e bënë më keq? Rrinte në portën e shtëpisë dhe mbante thikën në dorë e thoshte se do të vriste veten e tij. Unë në dhomë isha aty ku fle vetë. Vajza te kompjuteri u frikësua kur pa policinë. Të gjithë ne u frikësuam. Nga policët Beni kishte shumë frikë, e nuk dilte jashtë. Unë dola në dritare të shikoja kur disa policë shqyen kangjellën e më nxorën nga dritarja. Më pas shqyen kangjellat e të gjitha dritareve të shtëpisë, nxorën edhe mbesën. Djali im Beni qëndronte në portë e thoshte që do t’i bënte keq vetes po të hynte policia, se ishte bërë shumë nervoz.
Zonjë kur ndërhyri policia ku ishit ju?
Jashtë në oborr isha. Policët me skafandra të veshur e me armë në dorë hynë nga dritaret, ndërsa nga dera hynë ca të tjerë me një tub me gaz. Beni qëndronte pas derës kryesore në sallon. Aty ma helmuan djalin, e qëlluan dhe e bënë gjak të gjithë shtëpinë. I vunë gazin dhe një divan u dogj. Shkatërruan me dyer e me dritare. I vura prapë javën e shkuar se kisha frikë se do më mbysnin natën. Pastaj e morën djalin ashtu të legjendisur. Nipi që bëri të gjithë këtë teatër, që lajmëroi policinë, nisi pinte e u shpërndante birra policëve, pasi arrestuan djalin.
Zonja Shahe, policia tha që djali juaj mori peng mbesën 11-vjeçare.
Jo nuk mori peng askënd. Po mbesat e tij do të merrte peng? Ne jemi komshinj derë me derë e vajzën e mori t’i rregullonte kompjuterin. Vajza erdhi vetë dhe ishte si kokrra e mollës edhe kur iku. Pse nuk doli vajza me nënën, e të thoshte çfarë ngjau? Por të gjitha i bëri babai i tyre si film, së bashku me policinë.
E takuat djalin më pas?
Shkova te paraburgimi i Durrësit, dhe kërkova takim. Djali më erdhi me një sy të enjtur e të bërë gjak të kuq. Nuk më njohu mua që isha nënën e tij. I fola, por nuk më njihte. E kish humbur arsyen pas asaj që ka hequr. Ai i sëmurë ishte, por në vend ta mbanin më afër, pse e bënë më keq? Pse e sëmurën edhe më shumë, sa të mos njohë më nënën e tij? E kanë rrahur sa ishte enjtur aq shumë.
Në çfarë gjendje ishte djali juaj pasi doli nga burgu? A është kuruar në spitalin psikiatrik të Elbasanit?
Arbeni ka bërë 22 vjet burg në Itali. Doli dhe erdhi në shtëpi. 19 vjet më parë vdiq bashkëshorti. Ai nuk ishte në varrim të të atit. Kjo duket se i ka lënë pasoja. Kur doli nga burgu, askush nuk ja hapi derën edhe pse jemi fis i madh. Askush nuk e mbështeti. Më thoshte që o nënë, pse ti i qeras të gjithë njerëzit e i fut brenda, kurse mua nuk më hap asnjë njeri derën? Askush nga fisi a nga kushërinjtë e tij, nuk e mbështeti fare djalin. Di që policia kur e ka gjetur rrugës e ka çuar në spital për kurim, dhe spitali e ka lejuar të vinte në shtëpi.
U mundove të flisje me mbesën e nipin pas ngjarjes?
Fola me mbesën e vogël, e pyeta si ishte. I thashë, pse e bëtë gjithë atë zallamahi me polici, pse na vutë bojën të gjithëve? Vajza i tha të atit dhe pas një ore më erdhi policia në shtëpi, sikur unë plaka që kam mbetur vetëm një grusht kockash do të vrisja njeri.
Zonja Shahe, pas kësaj çfarë do bëni?
Pas kësaj mua nuk më flet më njeri në lagje, as kunetërit dhe asnjë nga fisi. Të gjithë më kanë harruar. Jam një plakë që qaj për së gjalli djalin, duke pritur vdekjen time.
Ngjarja sipas njoftimit të policisë:
Më datë 15.08.2016, rreth orës 07:00, në Kodër Rrashbull, shtetasi Arben Kabashi, 46 vjeç, ka kapëryer murin rrethues dhe është futur në banesën e komshiut, ku ka marrë me forcë në banesën e tij, vajzën e komshiut, shtetasen e mitur, Xh.K. 11 vjeçe. Në banesë ndodheshin vetëm tre vajzat pasi prindërit kishin ikur në punë më herët. Me të marrë njoftimin menjëherë në vendngjarje kanë shkuar Efektivat e Policisë së Durrësit, të cilët kanë rrethuar banesën. Shtetasi i lartpërmendur i cili vuan nga depresioni mbante në dorë një thikë dhe kërcënonte se do të vriste vajzën. Ndodhur në këto kushte, në pamundësi të faktorit kohë për të pritur forcat më të specializuara për të tilla ndërhyrje, efektivat e Policisë Durrës duke parë që po i kërcënohej seriozisht jeta vajzës, me iniciativë dhe me profesionalizëm kanë ndërhyrë me shpejtësi në disa drejtime duke i tërhequr vëmendjen agresorit. Falë ndërhyrjes së shpejtë dhe të specializuar të Policisë së Durrësit është bërë e mundur që e mitura të nxirret nga banesa e shtetasit Arben Kabashi dhe është dërguar në banesën e saj.Fatmirësisht vajza është në gjendje të mirë shëndetësore, por e traumatizuar psikologjikisht dhe policia menjëherë i ka çuar një psikologe. /Durrësilajm
