Mazhoranca dhe opozita shkojnë sot të ndara në parlament. Pas ndryshimeve me konsensus të Kushtetutës më 22 korrik, me ndërmjetësimin e LSI, duket se palët kësaj radhe nuk e kanë gjetur gjuhën e përbashkët.
Ajo që dihet deri tani është se PS+LSI e votuan në komisionin e reformës draftin e vettingut, ndërsa opozita ka paraqitur në kuvend një variant tjetër me 28 amendamente për këtë ligj të rëndësishëm.
Seanca e jashtëzakonshme është thirrur sot në orën 17:00 dhe mund të zgjasë deri pas mesnate. Projektligji i vetingut synon pastrimin e sistemit të drejtësisë nga prokurorët dhe gjyqtarët me pasuri të paligjshme, me lidhje me krimin dhe të paaftë profesionalisht.
Ndarja
Amendamentet e dorëzuara në Kuvend nga PD-ja rrëzojnë të gjitha shtyllat kryesore që janë cilësuar nga Bashkimi Europian dhe nga Shtetet e Bashkuara të Amerikës si “vijat e kuqe”. PD ka propozuar që procesi i vetingut për secilin gjyqtar të bëhet me afate kohore dhe me një kalendar të miratuar. Duke dhënë si argument faktin se çdo rivlerësim do të synohet të bëhet në një afat sa më të shkurtër kohor.
Kjo kërkesë nuk iu pranua nga EURALIUS në mbledhjen e fundit dhe këtë propozim që iu rrëzua, PD e ka dërguar sërish në Kuvend si amendament. Po ashtu, PD ka propozuar që kontrolli i pasurive dhe kontrolli figurës të mos bëhet nga ILDKP dhe DSIK. Por edhe ky propozim u rrëzua nga ndërkombëtarët.
Në projektligjin që do të votohet në Parlament është përcaktuar që institucionet ekzistuese të bëjnë verifikimin e pasurive dhe të figurës, pra ILKDP dhe DSIK.
Ndërkohë që përgjimi i telekomunikacioneve të anëtarëve të Komisionit të vetingut do të bëhet nga Njësia e Prokurorisë së Posaçme. Ndërsa monitorimi i pasurive të anëtarëve të vetingut do të bëhet nga Drejtoria e Përgjithshme e Parandalimit të Pastrimit të Parave.
PD ka propozuar që të rishikohet roli i Operacionit Ndërkombëtar të Monitorimit, por EURALIUS dhe OPDAT e kanë hedhur poshtë këtë propozim, duke e cilësuar si ndër pikat që nuk negociohet.
Tjetër pikë që PD kundërshton është përfshirja e bashkëpunëtorëve të drejtësisë në procesin e vetingut. Por kjo pikë është cilësuar shumë e rëndësishme dhe është renditur si kriteri numër katër i ndërkombëtarëve, që nuk mund të preket.
Votat
Ndryshe nga amendamentet kushtetuese që kërkonin 94 vota në Kuvend, projektligji i vetingut mund të miratohet me 84 vota, të cilat maxhoranca, PS LSI PDIU aktuale i ka.
