Policia e Fierit ka zbardhur ngjarjen e ndodhur ditën e djeshme në Lushnje, ku një person mbeti i plagosur rëndë pasi u godit mbi 10 herë me thikë nga dy persona.
Sipas një njoftimi të Policisë, janë identifikuar dy autorët, ku njëri prej tyre është vënë në pranga. Ai është Arjan Aliço, 53 vjeç, banues më parë dhe i dënuar për vrasje dhe i njohur si pjesëtar i bandës së Lushnjës.
Gjithashtu, është shpallur në kërkim edhe shtetasi Xh.A. 24 vjeç, banues në Lushnje dhe i dënuar për vrasje të mbetur në tentativë, raporton panorama.
“Këta shtetas në bashkëpunim me njëri-tjetrin, pas një konflikti për motive të dobëta, më datën 11.06.2016 rreth orës 19:15, në lagjen “Skënder Libohova” kanë tentuar të vrasin me thikë dhe sende të forta duke e goditur mbi 10 herë shtetasin J.S, 36 vjeç, banues në Karbunarë e Madhe”, thuhet ne njoftimin e policisë.
Aktualisht ky shtetas ndodhet i shtruar në Spitalin e Traumës në Tiranë në gjendje të rënde për jetën.
Ngjarja ka ndodhur pak minuta pas ndeshjes Shqipëri-Zvicër, në një pikë lloto bastesh dhe ka pasur si motiv pikërisht lojën e kombëtares.
Materialet do i kalojnë Prokurorisë pranë Gjykatës së Shkallës së Parë Lushnje për veprën penale “Vrasjes e mbetur në tentativë e kryer në bashkëpunim” parashikuar nga Nenet 76, 22 dhe 25 të Kodit Penal.
