Lorik Cana është vënë në qendër të vëmendjes për atë karton të kuq që mori në debutim në Kampionatin Evropian Kapiteni i Kombëtares shqiptare, Lorik Cana, në një intervistë për “L’Equipe” ka shpjeguar edhe njëherë kartonin e kuq që mori në ndeshjen ndaj Zvicrës.
Fillimisht gazetarët francez e kanë pyetur kapitenin nëse ai e meritonte përjashtimin. Përgjigja e Canës duke iu referuar të përditshmes kryesore sportive në Francë është kjo.
“Në momentin që gjyqtari vërshëllen për prekjen e topit me dorë, kartoni i verdhe është normal. Mendoj se nuk duhet të kisha marrë kartonin e parë të verdhë, duke qenë se ishte faulli im i parë në ndeshje. Është mëkat pasi skuadra kishte këmbët, lojën dhe mentalitetin për të marrë një rezultat të mirë. Na u deshën 15 minuta për t’u futur në ndeshje, ishim të tensionuar, morëm atë gol që nuk duhet ta kishim pësuar, por nuk ja arritëm”.
Më pas një shpjegim akoma më i detajuar i Lorik Canës për episodin që i kushtoi kartonin e dytë të verdhë, shkruan Supersport.
“Jam në duel me Seferovic, ai më shtyn pak, unë rrëshkas dhe bie. E shikoj që jam jashtë zonës, përpiqem të largoj topin me kokë, e shoh që nuk e arrij, nuk mund ta lë vetëm për të bërë gol kështu që rrezikoj. Përpiqem të përdor shpatullën, kokën, por e prek topin me dorë. Në momentin kur arbitri vërshelleu shpresova që ta kishte dhënë në favorin tonë pasi pati një shtytje ndaj meje, por nuk isha i sigurt se për kë do ta jepte faullin. Nëse do të kishim qenë në zonë, nuk do ta kisha prekur topin me dorë”, ka deklaruar Cana.
