Ministria e Energjisë i ka dhënë një kompanie kanadeze me emrin “Zenith Energy” koncesionin ekskluziv për kërkimin e naftës në bllokun tokësor C. Lajmi është bërë publik nga vetë kompania, e cila nëpërmjet një deklarate zyrtare thotë se është njoftuar nga autoritetet shqiptare si fituesja në tenderin për të drejtën e eksplorimit në këtë zonë.
Blloku C shtrihet në jug të qytetit të Durrësit, përgjatë rajonit qëndror bregdetar të vendit dhe përfshin një territor prej 900 kilometrash katrorë. Tenderi për dhënien e konçesionit të kësaj zone është hapur një vit më parë së bashku me 6 blloqe të tjera hidrokarbure.
Sipas kompanisë kanadeze, studimet paraprake në këtë zonë tregojnë për praninë e rezervave masive të gazit, përfshirë fushën Divjakë-Ballaj ku mendohet se gjenden deri në 2.2 miliardë metër kub gaz, raporton syri.net.
Zenith Energy zotëron aktualisht 15 fusha naftëmbajtëse në disa vende përfshirë Kanadanë, Argjentinën dhe Italinë. Sipas kompanisë, blloku C në Shqipëri gjendet vetëm 60 kilometër larg aseteve që ajo zotëron në Pulja dhe Molize të Italisë, çka përbën një tjetër avantazh.
Deri pak muaj më parë, zonat hidrokarbure ishin nën administrimin e Albpetrol dhe ka qenë kjo kompani që i ka transferuar ato tek privatët përmes negociatave të drejtpërdrejta. Me ndryshimin e ligjit, e drejta e kërkimit jepet nga Ministria e Energjisë përmes kritereve të paracaktuara.
Industria vendase e naftës po kalon një moment të vështirë për shkak të konjukturës së pafavorshme në tregjet botërore. Rënia e çmimeve në tregjet ndërkombëtare ka goditur dukshëm investimet në këtë sektor, jo vetëm në kërkim, por edhe shfrytëzimin e burimeve ekzistuese. Qeveria shpreson që përmes koncesioneve të reja të riaktivizojë kërkimet hidrokarbure dhe të tërheqë kapital nga jashtë për të ndihmuar ekonominë.
