Që kur lëshoi kushtrimin ndaj popullit që të armatoset, Sali Berisha është përballur me një numër të lartë vizitash, më të shpeshta se kurrë më parë në zyrën e tij, nga ambasadori i Shteteve të Bashkuara në Tiranë, Donald Lu.
Edhe pse pa përmendur se çfarë i ka thënë Lu në takimin e sotëm, Berisha e ka nënkuptuar qartë se ai ia ka vënë theksin te reforma në drejtësi.
Dhe Berisha është personi që Lu ka takuar më shpesh nga politikatën shqiptarë kohët e fundit, ndoshta jo rastësisht.
“Te dashur miq, sot prita në një takim ambasadorin amerikan zotin Donald Lu, me të cilin diskutova gjërësisht për problemin e reformës në drejtësi, prespektivën e kësaj reforme. Ambasadori Lu me njohu me rëndësinë shumë të madhe që qeveria e tij i kushton kësaj reforme si dhe me punën që kanë bërë këto ditë ekspertët ndërkombëtarë”, – shkruante Berisha.
“Opozita është forca politike më e interesuar për reformën, të cilën Rama bëri gjithçka ta përjashtonte nga procesi, ndonëse asnjëherë, nuk kishte ndodhur kurrë që Kushtetuta të amendohej pa opozitën. Kjo praktikë që ndoqi Rama bëri që të humbet një vit kohë dhe dy draftet të kthehen me vërejtje thelbësore nga Komisioni i Venezias, vërejtje që në tërësi ishin paraqitur nga opozita. Shpreha besimin se nëse ekziston vullneti politik i sinqertë kjo reformë mund të votohet me konsensus të plotë në parlament”, – vijonte më tej ish-kryeministri në Fb.
Ndërkohë, pasi ka ezauruar se çfarë i ka kërkuar Lu, Berisha ka treguar atë që ka patur merak t’i shprehë ai mabasadori amerikan.
“Në takim u diskutua gjërësisht mbi gjendjen e kriminalitetit në vend. Theksova se lidhjet e Ramës me krimin, vrasësit dhe bandat, janë një problem tmerrësisht shqetësues për opozitën dhe vendin. Rasti Arben Frrokut është një dëshmi tjetër e lidhjeve të fuqishme të Ramës dhe qeverisë së tij me krimin ndaj dhe ndihma e SHBA-ve në problemet e dekriminalizimit është e një rëndësie shumë të madhe”, – shkruante deputeti demokrat./Mapo
