Prej më shuam se 10 ditë, rreth 60 familje të fshatit Markatomaj në Lezhë vuajnë mungesën e ujit të pijshëm.
Banorët deklarojnë se deri më tani askush nuk i ka dhënë zgjidhje problemit të tyre pasi edhe projekti i ujësjellësit të ri është lënë në gjysmë.
Edhe pse thonë se janë taksapagues të rregullt, banorët shprehen se kjo situatë u ka vështirësuar jetesën pasi askush nga institucionet shtetërore nuk u përgjigjet, ndërsa ujin detyrohen ta blejnë ose ta mbushin nëpër burime.
“E kam paguar ujin rregullisht, një për një. Shtetit nuk ja kam një qindarkë borxh dhe jam vetë i shtati pa pikën e ujit. Komuna thotë do ta ndreq sot do ta ndreq nesër. Shkoj prap do ta ndreqim, por kur do ndreqet ky ujë apo kur të vdesim ne”, shprehet një banor.
“Kjo është katastrofë, jo vështirësi. Duhet me ndenj edhe natën gjithsecili ,kush po mbush paguret e ujit, kush po mbush kovën për tek boti atje se duhet me ndenje fik dhe ndez natë e ditë”, thotë një banore e zonës.
“Situata shumë e vështirë se kështu shihet vetë dhe nxehtësia, por kryesorja është që nuk kemi ujë as me u la”, thotë një banor tjetër.
Sipas banorëve pjesë e projektit të Ujësjellësit të Ri të fshatrave të Zejmenit është dhe Markatomaj, por investimi është lënë në gjysmë.
“Ujësjellësi i ri, nuk e ka pikën e ujit. Shpjegimi i tyre është tubin kryesore e kanë lidhur në tub të vjetër. Me u la marr botin , mbush bidonin 70 kg gruaja këtu” thotë banori i fshatit Markatomaj
“Kërkojmë ujësjellësin e ri, të na e lëshojnë të vij 6 orë uji të paktën”, shprehet një banor tjetër.
Burime nga Bashkia Lezhë bëjnë me dije se Ujësjellësi i ri nuk do të merret në dorëzim pa përfunduar plotësisht investimi siç është parashikuar në projekt dhe riparuar problematikat e shfaqura.
