Tefta Malaj, 39-vjeçarja shqiptare e cila mbeti e plagosur me thikë nga bashkëshorti i saj, Taulant Malaj, ka dhënë dëshminë e saj ditën e sotme para hetuesve italianë.
Në seancën e zhvilluar mëngjesin e sotëm, Tefta Malaj u tha hetuesve se bashkëshorti i saj “ishte shumë posesiv” dhe “aq xheloz” saqë e pengonte të kishte kontakte me jashtë, madje edhe të dilte nga shtëpia për të pirë kafe me miqtë.
Vitin e fundit, sipas dëshmisë së përcjellë nga agjencia italiane e lajmeve, sjellja e tij ishte përkeqësuar edhe më shumë, për lidhjen jashtëmartesore që ai dyshonte se gruaja kishte me 51-vjeçarin Massimo De Santis. Një lidhje që gruaja e ka mohuar në mënyrë kategorike, duke thënë se bëhej fjalë vetëm për një miqësi të thjeshtë.
Gruaja gjatë seancës së saj në spital, ku ndodhet e shtruar që nga e diela e kaluar, foli për armën e vrasjes, duke thënë se nuk e kishte parë kurrë atë thikë (18 centimetra e gjatë me një teh 8 cm) në shtëpi dhe se ndoshta burri i saj e kishte marrë më herët.
Tefta konfirmoi po ashtu të gjithë dinamikën e krimit të dyfishtë dhe plagosjes së saj, e cila është shfaqur edhe në videot e regjistruara nga kamerat e vendosura në shtëpi, por edhe nga vetë rrëfimi i burrit të saj. Sipas asaj që shkruan ANSA, hetuesit janë përqendruar në mënyrë të veçantë tek marrëdhënia mes bashkëshortëve.
Marrja në pyetje, e cila u zhvillua në departamentin e kirurgjisë së përgjithshme të Policlinico Riuniti të Foggia, zgjati rreth dy orë dhe u zhvillua në prani të zv.prokurorit Antonio Laronga dhe prokurores Sabrina Cicala të ndihmuar nga karabinierët. E pranishme ishte edhe nëna e Teftës, e cila u largua menjëherë më pas në shoqërinë e prokurorit.
Massimo De Santis u vra me 23 plagë me thikë, 16-vjeçarja Jessica me gjashtë goditje, të gjitha në gjoks. Kjo është konstatuar nga autopsia, e kryer në institutin e mjekësisë ligjore të Foggia-s.
Në burg, autori i pranuar për vrasjen e dyfishtë është bukëpjekësi 45-vjeçar Taulant Malaj, i cili dyshohet se fillimisht vrau fqinjin e tij, i bindur se kishte lidhje me gruan e tij dhe më pas vrau vajzën e tij Xhesika në tentativë për të mbrojtur nënën e saj.
Tefta Malaj po ashtu para hetuesve mësohet të jetë shprehur se kamerat në shtëpi, në dhomën e ndenjes dhe atë të gjumit, i kishte vendosur për të kontrolluar të shoqin, pasi kishte mësuar se ai ngacmonte seksualisht Jessica-n, kur ajo ishte 14-vjeçe.
Për momentin Tefta vijon të jetë e shtruar në spital, ndërsa varrimi i vajzës së saj, i propozuar nga tezja e viktimës, mund të bëhet në Shqipëri./Opinion.al
