Rudina Magjistari, dashuria 4 vjeçare tani quhet Mia

Është e çuditshme por vitet e shumta në ekran nuk ia kanë zbehur sharmin dhe e bëjnë ende një nga prezantueset më të dashura. Moderatorja e dashur e pasditeve tona, Rudina Magjistari i ka munguar për pak muaj ekranit, sepse mbrëmë ka sjellë në jetën vajzën e saj të parë, Mia. Dashuria katërvjeçare mes saj dhe ish-kampionit të Kickbox-it, Xhavit Bajrami është kurorëzuar me një vogëlushe, që siç ka thënë ajo nëpërmjet një statusi në faqen e saj zyrtare në Facebook ,ua mbushi jetën plot. Rudina ka vendosur ta lind vogëlushen në Tiranë dhe jo në Zvicër, vend ku ka jetuar për shumë vite partneri i saj, Xhavi (siç ajo e thërret shkurt). Gjatë periudhës së shtatzënisë ajo ka qëndruar shumë larg mediave dhe nuk është shfaqur pothuajse fare në publik.

E njëjta gjë ka ndodhur edhe me jetën e saj private, të cilën Rudina e ka ruajtur gjithnjë me fanatizëm. Për dashurinë e saj të re, do të fliste hapur në vitin 2013, në studion e kolegut, Arian Çani. Lajmi për lidhjen e saj ishte bërë publik nga suplementi “Bluetooth”, por Rudina e rrëfehu historinë e saj të dashurisë një javë më pas në “Zonë e Lirë”. Historia e tyre nisi me një mesazh në “Facebook”, që u pasua me mesazhe e telefonata të gjata, derisa Xhavit Bajrami (8 herë kampion në Kickbox) vendosi ta braktisë jetën në Zvicër, për të jetuar me Rudinën në Tiranë. Këtu ka hapur një palestër të madhe, si dhe ka organizuar  për herë të parë, Federatën Kombëtare të Kickbox-it në Shqipëri.

Bashkëjetesën e nisën krejt natyrshëm, duke kuptuar ditë pas dite që bashkë ndanin të njëjtat shije dhe interesa, si të jetuarit shëndetshëm, me regjim, aktivitet fizik e gjithçka. Një jetë intesive, që me ardhjen në jetë të Mias së vogël jemi të sigurt që do të ndryshojë shumë për Rudinën dhe Xhavitin, e që sigurisht do të jetë më e plotë dhe më e bukur. Ndërsa atyre që iu mungojnë pasditet me Rudinën, “Takimi i Pasdites” do të rikthehet në Klan sezonin e ardhshëm televiziv.