Ambasada Amerikane në Shqipëri ka uruar mëngjesin e sotëm 8, Dhjetorin Ditën e Rinisë.
Në një njoftim në rrjetin social “Facebook” ambasada thekson se sot nderohen studentët guximtarë që 31 vjet më parë protestuan kundër një prej regjimeve më mizore të Europës, duke kërkuar fundin e komunizmit dhe fillimin e një epoke të re.
Ambasada Amerikane ndër të tjera shkruan se është krenare që qëndroi atëherë në krah të popullit shqiptar dhe nënvizon se do të qëndrojë pranë nesh teksa Shqipëria përqafon të ardhmen.
“Sot, ne nderojmë studentët guximtarë të cilët 31 vjet më parë protestuan sypatrembur kundër një prej regjimeve më mizore të Europës, duke kërkuar fundin e komunizmit dhe fillimin e një epoke të re lirie, pluralizmi, ekonomie tregu, lirie fetare dhe lirie të fjalës. Ata kërkuan një Shqipëri “si gjithë Europa”. Ne jemi krenarë që kemi qëndruar në krah të popullit shqiptar atëherë dhe do të qëndrojmë krah tij ndërsa ata përqafojnë të ardhmen”, thuhet në reagimin e ambasadës.
Sot shënohen 31 vite nga fillimi i Lëvizjes Studentore që solli rrëzimin e regjimit komunist në Shqipëri./Opinion.al
