Prokuroria e Krimeve të Rënda pritet të japë nesër pretencën për biznesmenin Arbër Çekaj, i konsideruar si ‘peshku i madh’ i kokainës nga ish-ambasadori amerikan Donald Lu. Ai dyshohet si pronari i sasisë rekord prej 613 kilogram kokainë të kapur në kontinierin me banane dhe si koka e një grupi kriminal trafiku për lëndë narkotike. Megjithatë ai ka akuzuar se e gjithë çështja ndaj tij është ngritur me qëllim për të mos prekur pronarët e vërtetë të drogës dhe për këtë ai ka shënjestruar prokurorinë, policinë dhe politikën.
Në një intervistë të dhënë për News 24, Arbër Çekaj është shprehur se operacioni në kuadër të të cili u sekuestruan 613 kilogram kokainë, është ndërprerë në mes me urdhër të një personi të cilin ai nuk e zbulon dhe e ka konsideruar këtë një veprim të qëllimshëm si nga ana e prokurorisë dhe e policisë. Sipas tij ndërprerja e operacionit është bërë që kokaina të kapej në magazinat e kompanisë së tij dhe jo pasi të zbulohej grupi i vërtetë kriminal të cilin sipas tij askush nuk guxon ta prekë.
“Është totalisht e qëllimtë nga ana e policisë, prokurorisë dhe atij personi i cili dha urdhër që operacioni të ndërpritej në magazinat e kompanisë time. Nëse operacioni do të shkonte deri në fund, patjetër që do të ishte kapur grupi kriminal e jo unë. Me gjeni një vend normal të botës që arrestohet pronari i kompanisë që importon fruta, se në kontenierët që nuk janë fare të tijët, gjendet drogë. I vetmi vend është Shqipëria, edhe në Shqipëri i vetmi pronash frutash në burg jam unë. Pra prokuroria ka luftë personale ndaj meje e familjes time, e kjo vetëm për të mbrojtur grupin e vërtetë kriminal që ata e dinë se kush është, por askush nuk guxon ta prekë”.
Sipas Çekajt, policia dhe prokuroria punojnë me dy standarde ndërsa për ish-ambasadorin e SHBA, Donald Lu thotë se e kanë keqinformuar me dashje në lidhje me të.
“Duke patur respektin maksimal për Amerikën, si mik i Amerikës që jam (e miku nuk gënjehet), unë nuk kam qenë e as nuk do të jem kurrë, peshk i madh apo i vogël i kokainës. Zotin Lu e kanë keqinformuar me dashje ne lidhje me mua”.
Ai ka përjashtuar çdo mundësi për lidhje me politikën pasi nëse do ti kishte nuk do të ishte prapa hekurave.
“Nëse do të kisha miq në politikë nuk do të isha në burg. Me thënë të drejtën kam antipati për politikën, sepse ishte ajo që më futi në burg, për të bërë show, betejën politike të radhës, dhe kurbani i radhës isha unë”.
Ai akuzon se fushata kundër tij është bërë edhe nga mediat e kontrolluara nga qeveria dhe në kushtet kur sipas tij është arrestuar pas asnjë provë pranon se ndihet i rrezikuar.
“Frika nuk ka qenë asnjëherë bashkëudhëtarja ime në jetë. Sepse nuk kam bërë asgjë për të patur frikë, por në kushtet ku ndodhem, kur shteti ka strukturat e veta, përfshi edhe mediat e varura prej tij, në vend që të më mbrojnë liritë si shtetas shqiptar, më fusin në burg pa asnjë provë për të mbuluar e shpëtuar trafikantët, mundohet të më fusë në konflikt me njerëz që nuk i njoh e s’kam lidhje, mundohet të më mbyllë biznesin e të më sekuestrojë çdo gjë që kam. Në këto kushte çdo njeri normal do të ndihej i frikësuar besoj… Megjithatë me të më të frikësuar janë ata që kanë frikë nga e vërteta, sesa unë nga padrejtësitë”. /Opinion.al
