Ka shkuar në 28 numri i personave që humbën jetën nga sulmi në aeroportin e “Stambollit” në Turqi.
Numri është konfirmuar nga Kryetari i Bashkisë, Vasip Sahin për agjencinë publike të lajmeve TRT.
Nuk është e qartë nëse në këtë numër përfshihen edhe terroristët që kryen sulmin. Nga ana tjetër agjencia “Anadolu” raporton se gjashtë nga 60 persona e plagosur janë në gjendje të rëndë.
Ndërkohë, Ministria e Jashtme e Shqipërisë njofton se nuk ka asnjë shtetas shqiptar të lënduar nga këto sulme.
Është konfirmuar tashmë se në sulm kanë marrë pjesë tre persona, ku dy prej të cilëve kanë hedhur veten në erë ndërsa i treti është qëlluar nga policia.
Ministri i Drejtësisë, Bekir Bozdag ka bërë të ditur për CNN se një prej terroristëve fillimisht hapi zjarr me kallashnikov para se të hidhte veten në erë në hyrjen e aeroportit.
Në total pati dy shpërthime me bombë. Njëri ndodhi pak metra jashtë terminalit, ndërsa shpërthimi tjetër ishte në portën e sigurisë për në aeroport.
Sipas informacionit të autoriteteve turke asnjë nga shpërthimet nuk ka ndodhur brenda ndërtesës së aeroportit.
Sipas asaj që raporton “Reuters”, policia ka hapur zjarr ndaj të dyshuarve në hyrje të aeroportit.
Ndërkohë ministri i Drejtësisë, Bekir Bozdag ka deklaruar gjatë fjalës në Parlament se kanë humbur jetën 10 persona dhe 20 të tjerë janë plagosur.
Aeroporti është mbyllur plotësisht si për hyrje ashtu edhe për dalje. Aeroporti “Mustafa Qemal Ataturk” është më i madhi në Turqi. Stambolli ka aeroportin e 20 më të madh në botë dhe të tretin në Evropë.
Turqia e cila është pjesë e koalicionit të drejtuar nga SHBA kundër Shtetit Islamik, gjithashtu po lufton dhe militantët kurd.
