Lideri i Lëvizjes Vetëvendosje, Albin Kurti, ka një afat prej dy javësh që të formojë Qeverinë e re të Kosovës.
Pas propozimit të tij si i mandatuar për kryeministër të ri të Kosovës nga Lëvizja Vetëvendosje dhe dekretimit të këtij propozimi nga presidenti i vendit, Hashim Thaçi, të cilin ky i fundit e ka dërguar në Kuvendin e Kosovës, të hënën, ka nisur rrjedhja e afatit të parë ligjor prej 15 ditësh, për krijimin e qeverisë së re të vendit.
Sipas Kushtetutës së vendit, në rast se formimi i qeverisë nga i mandatuari i parë për kryeministër dështon, Presidenti ka të drejtën që të emërojë të mandatuarin e dytë për formimin e qeverisë brenda afatit ligjor prej 10 ditësh.
Ndërkaq duke marrë parasysh tentativat e deri tanishme të pasuksesshme për krijimin e një koalicioni ndërmjet Lëvizjes Vetëvendosje, si fituese e zgjedhjeve të parakohshme parlamentare të 6 tetorit dhe Lidhjes Demokratike të Kosovës, pritet që gjatë dy javëve të ketë skenarë të ndryshëm për gjetjen e një zgjidhjeje për formimin e qeverisë së re, në mënyrë që vendi t’i shmangë zgjedhjet e parakohshme./Opinion.al
