Më 27 Korrik 2016, kryeministri Edi Rama firmosi një vendim, që i jepte një kompanie të quajtur ‘Recovered Earth Albania’ 5.7 hektarë truall në Kasnicë të Patosit, me çmim 1 euro.
Trualli ishte pronë e shoqërisë ‘Albpetrol’, por Ministria e Ekonomisë, e shkëputi nga Albpetroli dhe trualli i kaloi kompanisë private.
Për të mësuar më tepër në lidhje me këtë vendim, HashtagAL ju drejtua zyrtarisht Ministrisë së Ekonomisë duke i drejtuar disa pyetje në lidhje me natyrën e projektit dhe shfrytëzimin që do realizohej.
Ministria tha zyrtarisht se kompania‘Recovered Earth Albania’ është një firmë amerikane, e cila do të investonte rreth 35 milionë dollarë deri në vitin 2018. Sipas ministrisë, kjo kompani amerikane, zotëronte një teknologji të përparuar, nëpërmjet së cilës mundësonte prodhimin e karburanteve duke përdorur rërën bituminoze si lëndë të parë.
Ministria tha se nga aktiviteti i kompanisë do të punësoheshin disa qindra persona dhe se kompania amerikane kishte ndërkohë një impiant të ngjashëm të përpunimit të naftës bruto në Kentucky të SHBA-ve.
Nga një verifikim elementar, rezulton se kompania që zhvillon këtë aktivitet në Kentucky të Shteteve të Bashkuara të Amerikës quhet ‘Recovered Earth Technologies’.Kjo kompani ka një emër të ngjashëm me firmën që ka fituar kontratën me qeverinë shqiptare, e cila quhet ‘Recovered Earth Albania’.
Por kompania e regjistruar në Tiranë, nuk rezulton të ketë ndonjë lidhje me kompaninë amerikane.
Pronësia e ‘Recovered Earth Albania’ është e tre individëve të përveçëm dhe asnjë kompani e huaj nuk posedon aksione në ‘Recovered Earth Albania’.
Aksionarët e ‘Recovered Earth Albania’janë si më poshtë:
Michael James Mills – 50 % të aksioneve.
Theodor Laçi – 30% të aksioneve
Erion Ylli – 20% të aksioneve.
Nga verifikimi i ekstraktit zyrtar të kompanisë që ka fituar koncensionin, nuk rezulton asnjë gjurmë apo pronësi e kompanisë amerikane ‘Recovered EarthTechnologies’.
Nga ana tjetër, kompania amerikane të cilën ministria e referon si ‘kompani me përvojë’ rezulton se ka pasur bashkëpunim me koncensionarin ‘Bankers Petroleum’ që operon në Patos-Marinzë dhe i ka shitur teknologji këtij koncensionari në të kaluarën.
Kompania ‘Recovered Earth Albania’ së cilës qeveria i dha koncensionin, është themeluar në Janar-2016, pra është kompani që ekziston prej 8 muajsh, ndërsa tre aksionarët e saj, kanë aksione nominale në emrin e tyre dhe nuk përfaqësojnë zyrtarisht asnjë kompani të huaj.
Mes listës së aksionarëve bie në sy emri i z.Erion Ylli, posedues i 20% të aksioneve. z.Erion Ylli është njëkohësisht dhe Zv/President i televizionit kombëtar Top –Channel.
/ HashtagAL /
Me poshte gjenden sqarimet e Ministrise per Koncensionin:
1.Cili do jete objekti i aktivitetit te kompanise qe ka siguruar kontraten enfiteoze?
Kompania do të ndërtojë një impiant të prodhimit të naftës bruto nga rëra bituminoze në fshatin Kasnicë të Fierit. Ky lloj investimi është tentuar me parë nga investitorë të ndryshëm, por nuk ka pasur fizibilitet. Kompania Recovered Earth ka teknologji unike të patentuar që e nxjerr me fitim këtë investim dhe në kushtet e çmimit të ulët të naftës në tregun boteror.
2. Cili do të jetë përfitimi i palës shtetërore?
Pala shtetërore ka fitime të shumëfishta. Se pari, vihet në shfrytëzim pasuri publike të fjetura si rëra bituminoze, si dhe një sipërfaqe trualli dhe objektesh të “Albpetrol” SHA, kundrejt një investimi prej të paktën 3.5 miliardë lekë brenda vitit 2018, çka nënkupton një angazhim të madh edhe të vetë sipërmarrjeve të zonës përresh ku kryhet investimi. Së dyti, do të punësohen brenda vitit 2018 rreth 360 persona në zonën e Ballsh Patos vetëm nga kjo kompani, pa përfshirë efektin indirekt të punësimit edhe në sipërmarrje të tjera përreth zonës.
Së treti, të ardhurat që do të vjelë shtetit nga i gjithë aktiviteti ekonomik që do krijojë kjo kompani në ketë zonë, duke filluar nga prodhimi i naftës e me rradhë që përkthehen në ardhura vjetore të larta.
3. A ka pasur një garë? Apo ishte ofertë e pakerkuar?
Për dhënien me qira të pasurisë “Truall dhe objekt të pasurisë nr.603/3, Z.K.2111, vol.2, fq.171, Kasnicë, Fier”, në pronësi të shoqërisë “Albpetrol” SHA, Fier është zhvilluar një konkurrim më datën 28.06.2016, në Ministrinë e Zhvillimit Ekonomik, Turizmit, Tregtisë dhe Sipërmarrjes. Në ketë konkurrim ofertuese e vetme ishte shoqëria “Recovered Earth Albania” SHA, e cila fitoi. Më datën 27.07.2016, Këshilli i Ministrave miratoivendimin për dhënien e miratimit për lidhjen e kontratës së qirasë me tarifën 1 euro/kontrata, ndërmjet Ministrisë së Zhvillimit Ekonomik, Turizmit, Tregtisë dhe Sipërmarrjes, si qiradhënës, dhe shoqërisë “Recovered Earth Albania”, sh.a.. Kontrata është në proces hartimi, sipas legjislacionit në fuqi.
4. Çfarë di ministria për eksperiencën dhe kapacitetet e kësaj kompanie dhe si i vlerëson ato?
Firma amerikane është pronare e një impianti të prodhimit të naftës bruto nga rëra bituminoze në Kentucky të SHBA-së, dhe ka teknologji unike për këtë biznes. Ky investitor ofron garanci teknike, por dhe financiare që është i aftë të bëjë dhe menaxhojë këtë investim shumë të rëndësishëm për Shqipërinë.
Sipas planit të biznesit të paraqitur në konkurrim, Recovered Earth Technologies (RE) është një lider global në rehabilitimin e burimeve natyrore duke përdorur një kombinim të teknologjive të licensuara dhe të patentuara. Produktet dhe sisitemi RE përdoren në të gjithë botën në naftë, gaz, bujqësi dhe tregjet kimike. Zotërojnë një gamë të gjerë sisitemesh nga zgjidhje komplete për ujin deri të rehabilitimi i tokës. RE është një kompani private me përgjegjësi të kufizuar në Nevada me selinë e saj në Reno dhe me zyra të tjera në Teksas, Florida dhe Londër. Ky ishte prezantim i shoqëruar me dokumentacionin përkatës paraqitur në konkurrim që mundësoi vlerësimin e bërë nga MZHETTS.
